தீவிரவாத இயக்கத்துடன் தொடர்பு: ஜம்மு-காஷ்மீர் அரசு ஊழியர்கள் நீக்கம்

தீவிரவாத இயக்கத்துடன் தொடர்பு கொண்டிருந்ததாக ஜம்மு-காஷ்மீர் அரசு ஊழியர்கள் 2 பேர் பணி நீக்கம் செய்யப்பட்டுள்ளனர்.

ஜம்மு-காஷ்மீர் யூனியன் பிரதேசத்தில் அரசு ஊழியர்களாக பணியாற்றி வந்தவர்கள் அப்துல் ரஹிம் நைக்கா, ஜாகிர் அப்பாஸ். இவர்கள் இருவரும் நேற்று முன்தினம் பணிநீக்கம் செய்யப்பட்டுள்ளதாக ஜம்மு-காஷ்மீர் அரசு அறிவித்துள்ளது.

ஜம்மு-காஷ்மீரின் பாதுகாப்பைக் கருத்தில் கொண்டு அவர்கள் 2 பேரும் நீக்கம் செய்யப்பட்டதாகவும், அரசியலமைப்புச் சட்டம் 311(2) (சி) பிரிவின்படி அவர்கள் நீக்கப்பட்டனர் என்றும் அரசு தெரிவித்துள்ளது. இதையடுத்து தேசத்தின் பாதுகாப்புக்கு குந்தகம் விளைவிக்கும் நடந்துகொண்டதாக பணிநீக்கம் செய்யப்பட்டவர்களின் எண்ணிக்கை 76-ஆக உயர்ந்துள்ளது.

இவர்கள் இருவருக்கும் ஹிஸ்புல் முஜாகிதீன் தீவிரவாத இயக்கத்துடன் தொடர்புடையதாக கூறப்பட்ட நிலையில் இந்த நடவடிக்கையை ஜம்மு-காஷ்மீர் அரசு எடுத்துள்ளது என்று துணைநிலை ஆளுநர் மனோஜ் சின்ஹா வெளியிட்டுள்ள அறிக்கையில் தெரிவிக்கப்பட்டுள்ளது.

பணிநீக்கம் செய்யப்பட்ட நைக்கா, சுகாதாரம், மருத்துவக் கல்வித்துறையிலும், அப்பாஸ், கிஸ்த்வார் மாவட்டத்திலுள்ள அரசுப் பள்ளியில் ஆசிரியராகவும் பணியாற்றி வந்தனர் என்பது குறிப்பிடத்தக்கது.