ஒடிசாவில் முன்னாள் ஐஏஎஸ் அதிகாரியும் பிஜு ஜனதா தளம் (பிஜேடி) தலைவருமான வி.கே.பாண்டியனின் மனைவி சுஜாதா கார்த்திகேயனை இடமாற்றம் செய்ய தேர்தல் ஆணையம் உத்தரவிட்டுள்ளது.
பிஜேடி முகவராக சுஜாதா செயல்படுவதாக பாஜக அளித்த புகாரை தொடர்ந்து இந்த நடவடிக்கை எடுக்கப்பட்டுள்ளது. ஒடிசாவில் ஐஏஎஸ் அதிகாரியாக பணியாற்றி வந்தவர் வி.கே.பாண்டியன், முதல்வர் நவீன் பட்நாயக்கின் சிறப்பு ஆலோசகராக இருந்த இவர், விருப்ப ஓய்வு பெற்று கடந்த நவம்பரில் பிஜேடியில் சேர்ந்தார். அக்கட்சியின் முக்கியத் தலைவர்களில் ஒருவராக இருந்து வருகிறார்.
வி.கே.பாண்டியனின் மனைவி சுஜாதா ஆர்.கார்த்திகேயனும் ஐஏஎஸ் அதிகாரி ஆவார். இவர் ஒடிசாவில் மிஷன் சக்தி துறையில் பணியாற்றி வந்தார். இந்நிலையில் சுஜாதா தனது கணவர் பாண்டியன் செலுத்தும் செல்வாக்கின் காரணமாக பிஜேடி முகவராக செயல்பட்டு வருவதாக பாஜக புகார் எழுப்பியது.
இது தொடர்பாக தேர்தல் ஆணையத்திடம் மத்திய அமைச்சர்கள் நிர்மலா சீதாராமன், ராஜீவ் சந்திரசேகர், பாஜக மூத்த தலைவர் சுதன்ஷு திரிவேதி உள்ளிட்டோர் புகார் அளித்தனர்.
பிஜேடியின் முன்னணி நபராக தேர்தல் பணிகளிலும் சுஜாதா தீவிரம் காட்டுவதாக பாஜக குற்றம் சாட்டியது. மிஷன் சக்தி துறையின் கீழ், ஒடிசா அரசு சுமார் 70 லட்சம் பெண்களை உள்ளடக்கிய 6 லட்சத்துக்கும் அதிகமான சுய உதவி குழுக்களை உருவாக்கியுள்ளது. பெண்களின் வாழ்வாதார நடவடிக்கைகளுக்காக இந்தக் குழுக்களுக்கு வங்கிக் கடன்களை ஒடிசா அரசு உறுதிப்படுத்துகிறது.
இந்த திட்டம் நவீன் பட்நாயக் அரசின் முன்னுரிமை திட்டங்களில் ஒன்றாக விளங்குகிறது. இந்நிலையில் தற்போதைய மக்களவை மற்றும் சட்டப்பேரவை தேர்தல்களில் வாக்குகளை பெறுவதற்காக ஆளும் கட்சியால் மிஷன் சக்தி துறை தவறாகப் பயன்படுத்தப்படுவதாகவும் பாஜக குற்றம் சாட்டியது.
இந்நிலையில் மிஷன் சக்தி துறையில் இருந்து சுஜாதா கார்த்திகேயனை மக்களுடன் நேரடித் தொடர்பு இல்லாதவேறு துறைக்கு உடனடியாக இடமாற்றம் செய்ய தேர்தல் ஆணையம் நேற்று உத்தரவிட்டுள்ளது.
இந்த இடமாற்ற உத்தரவை ஒடிசா மூத்த அதிகாரி ஒருவர் உறுதிப்படுத்தினார். சுஜாதாவின் புதிய நியமனம் குறித்த அறிவிப்பை ஓரிரு நாட்களில் அரசு வெளியிடும் என்றும் அவர் கூறினார்.