லாப நோக்கற்ற அமைப்பான ஊடக ஆய்வு மையம், கடந்த 35 ஆண்டுகளாக இந்தியாவில் நடைபெற்று வரும் தேர்தல்களுக்கான செலவினங்களை மதிப்பீடு செய்து வருகிறது. இந்நிலையில் 2024 மக்களவைத் தேர்தலுக்கான செலவினம் குறித்த மதிப்பீட்டை அந்நிறுவனம் வெளியிட்டுள்ளது.
இதன்படி, தற்போது நடைபெறும் மக்களவைத் தேர்தலுக்கான மொத்த செலவினம் ரூ.1.35 லட்சம் கோடியைத் தொடும் என்று அந்த அமைப்பு தெரிவித்துள்ளது. இது 2019 ஆண்டு மக்களவைத் தேர்தலுடன் ஒப்பிடுகையில் இருமடங்கு அதிகம் ஆகும்.
2019 தேர்தலுக்கு ரூ.60 ஆயிரம் கோடி செலவிடப்பட்டதாக ஊடக ஆய்வு மையத்தின் தலைவர் பாஸ்கர ராவ் தெரிவித்துள்ளார்.
தேர்தலுக்கு முந்தைய 4 மாதங்களில் அரசியல் கட்சிகள், வேட்பாளர்கள், அரசு, தேர்தல் ஆணையம் என நேரடியாக மற்றும் மறைமுகமாக தேர்தலுக்காக செலவிடப்படும் அனைத்து செலவினங்களையும் உள்ளடக்கி இந்த கணக்கீடு மேற்கொள்ளப்பட்டிருப்பதாக பாஸ்கர ராவ் தெரிவித்துள்ளார்.
இது குறித்து அவர் மேலும் கூறுகையில், “தேர்தல் சமயங்களில் கட்சிகள் மிகப் பெரும் அளவில் செலவிடுவது வழக்கம். பொதுக் கூட்டங்கள் நடத்துவது, அதற்கான போக்குவரத்து ஏற்பாடு, தேர்தல் பிரச்சாரத்தில் ஈடுபடுபவர்களுக்கான உணவு, ஊடகங்களில் விளம்பரம் வெளியிடுவது என பல தளங்களில் கட்சிகள் செலவிடுகின்றன.
இது தவிர்த்து அரசு மற்றும் தேர்தல் ஆணையம் தேர்தல் ஏற்பாடுகளுக்காக செலவிடுகின்றன. அந்த வகையில் தற்போதைய தேர்தலுக்கான மொத்த செலவினம் ரூ.1.35 லட்சம் கோடியைத் தொடும் என்று மதிப்பீடு செய்திருக்கிறோம். அரசியல் கட்சிகள் தேர்தலுக்காக செலவிடுவது பெரிய அளவில் அதிகரித்துள்ளது.
2019-ம் ஆண்டில் மொத்த தேர்தல் செலவினத்தில் பாஜகவின் பங்கு மட்டும் 45 சதவீதம் ஆகும். தேர்தல் பத்திரங்கள் தவிர்த்து பல்வேறு வழிகளில் கட்சிகளுக்கு பணம் வந்துள்ளன’’ என்று அவர் தெரிவித்தார்.