பெரிய சேஷ வாகனத்தில் பத்மாவதி தாயார் பவனி

திருச்சானூர் பிரம்மோற்சவ விழாவின் 2-ம் நாளான நேற்று காலையில், பெரிய சேஷ வாகனத்தில் பத்மாவதி தாயார் 4 மாட வீதிகளில் பவனி வந்து பக்தர்களுக்கு அருள் பாலித்தார்.

திருச்சானூர் பத்மாவதி தாயார் பிரம்மோற்சவ விழா நேற்று முன்தினம் கோலாகலமாக தொடங்கியது. இதன் 2-ம் நாளான நேற்று காலையில் பெரிய சேஷ வாகனத்தில் 4 மாட வீதிகளில் கதாயுதம் தாங்கி, அபய ஹஸ்தத்துடன் பத்மாவதி தாயார் பக்தர்களுக்கு காட்சி அளித்தார். அப்போது திரளான பக்தர்கள் வீதிகளின் இருமருங்கிலும் திரண்டு நின்று அம்மனை வழி்பட்டனர்.

இதில் பெரிய ஜீயர், சின்ன ஜீயர் சுவாமிகள் ஆழ்வார் திவ்ய பிரபந்தத்தில் 2-ம் திருவடி பாடியபடி 4 மாட வீதிகளில் வலம் வந்தனர். இவர்களுடன் யானை, காளை, குதிரை போன்ற பரிவட்டங்கள், பல மாநில நடனக் கலைஞர்களும் நடனமாடியபடி பங்கேற்றனர். இதைத் தொடர்ந்து இரவு அன்ன வாகனத்தில் தாயார் வீதியுலா வந்து பக்தர்களுக்கு அருள் பாலித்தார்.