31 - தாம்பரம்

காஞ்சிபுரம் மாவட்டத்தில் உள்ள 11 சட்டப்பேரவை தொகுதிகளில் ஒன்று தாம்பரம் தொகுதி. கடந்த 1977-ம் ஆண்டு உருவாக்கப்பட்டது. மாவட்டத்தில் மிகப்பெரிய தொகுதியாக இருந்து வந்த தாம்பரம் தொகுதி கடந்த 2011-ல் மேற்கொள்ளப்பட்ட தொகுதி மறுசீரமைப்பின்போது தாம்பரம், சோழிங்கநல்லூர், வேளச்சேரி ஆகிய தொகுதிகளாக பிரிக்கப்பட்டு சிறிய தொகுதியாக சுருங்கிவிட்டது. இத்தொகுதியில், தாம்பரம் நகராட்சி, சிட்லப்பாக்கம், செம்பாக்கம், மாடம்பாக்கம், பெருங்களத்தூர், பீர்க்கன்கரணை பேரூராட்சிகள், புனித தோமையார் மலை ஊராட்சி ஒன்றியம், முடிச்சூர், அகரம்தென், கஸ்பாபுரம், வெங்கம்பாக்கம், மதுரப்பாக்கம், திருவஞ்சேரி ஊராட்சிகள் உள்ளிட்ட உள்ளாட்சி அமைப்புகள் உள்ளன. தாம்பரம், சென்னையின் நுழைவு வாயிலாக திகழ்கிறது.

மிகவும் பழமைவாய்ந்த சென்னை கிறிஸ்தவக் கல்லூரி உள்பட ஏராளமான கலை அறிவியல் கல்லூரிகளையும், ஏராளமான தனியார் பொறியியல் கல்லூரிகளையும் தன்னகத்தே கொண்டுள்ளது. தனியார் பள்ளிகளுக்கும் பஞ்சமில்லை. புகழ்பெற்ற இந்திய விமானப்படை தளமும் இங்குள்ளது. தாம்பரம் தொகுதிக்கு உட்பட்ட பகுதிகளில் இந்துக்கள், கிறிஸ்தவர்கள், முஸ்லிம்கள், பிற மாநிலத்தவர்கள் என பல்வேறு சமூகத்தினர் வாழ்கிறார்கள். அரசு மற்றும் தனியார் ஊழியர்கள் குறிப்பாக தகவல் தொழில்நுட்ப பணியாளர்கள், வியாபாரிகள் என அனைத்து தரப்பு மக்களையும் உள்ளடக்கியது. நெல்லை, தூத்துக்குடி, கன்னியாகுமரி உள்ளிட்ட தென்மாவட்டங்களைச் சேர்ந்த மக்கள் அதிகளவு வசிக்கிறார்கள். மேலும், பாதுகாப்பு படையினரும், முன்னாள் பாதுகாப்பு படையினரும் கணிசமான எண்ணிக்கையில் உள்ளனர்.

தொகுதியில் நீண்ட கால பிரச்சினைகளுக்குக் குறைவில்லை. தாம்பரத்தை அடுத்த பெருங்களத்தூரில் தினமும் காலையும் மாலையும் ஏற்படும் கடும் போக்குவரத்து நெரிசல்தான் முதன்மையான பிரச்சினையாக கருதப்படுகிறது. தாம்பரம் நகராட்சியில் அரைகுறையாக இருக்கும் பாதாளச் சாக்கடை திட்டம், முக்கிய சாலைகளான ஜிஎஸ்டி சாலை, வேளச்சேரி சாலை, முடிச்சூர் சாலையில் ஏற்படும் போக்குவாத்து நெரிசல், சண்முகம் சாலையை ஜிஎஸ்டி சாலையுடன் இணைப்பது, வேளச்சேரி சாலையில் கேம்ப்ரோடு சந்திப்பு, ராஜகீழ்பாக்கம் சந்திப்பு இடங்களில் மேம்பாலம், முக்கிய சாலைகளில் இருந்து உள்புற இடங்களுக்குச் செல்ல மினி பஸ் சேவை என பொதுமக்கள் பல்வேறு பிரச்சினைகளையும் கோரிக்கைகளையும் முன்வைக்கிறார்கள்.

கடந்த 1977 முதல் 2011 வரை நடைபெற்ற 9 சட்டப்பேரவை தேர்தல்களில், 5 முறை திமுகவும் 3 முறை அதிமுகவும் வெற்றிபெற்றுள்ளன. காங்கிரஸ் கட்சி ஒரேயொரு முறை (1991) வென்றது. கடந்த 2006 சட்டப்பேரவை தேர்தலில் திமுக உறுப்பினர் எஸ்.ஆர்.ராஜாவும், கடைசியாக 2011-ல் நடந்த தேர்தலில் அதிமுக உறுப்பினர் டிகேஎம் சின்னையாவும் வெற்றிபெற்றனர்.

2016 தேர்தலில் களம் காணும் வேட்பாளர்கள் விவரம்

தொகுதியில் அடங்கியுள்ள பகுதிகள்

தாம்பரம் வட்டம்

கடப்பேரி, திருவஞ்சேரி, முடிச்சூர், கஸ்பாபுரம், வெங்கம்பாக்கம், அகரம்தென், கோவிலாஞ்சேரி, மதுரப்பாக்கம் மற்றும் மூலச்சேரி கிராமங்கள்.

தாம்பரம் (நகராட்சி), சிட்லப்பாக்கம் (பேரூராட்சி), செம்பாக்கம் (பேரூராட்சி), மாடம்பாக்கம் (பேரூராட்சி), பெருங்களத்தூர் (பேரூராட்சி) மற்றும் பீர்க்கன்கரணை (பேரூராட்சி)

29/04/2016-ன்படி வாக்காளர்கள் விவரம்:

2016 சட்டப் பேரவை தேர்தல்- வாக்கு விவரங்கள்

தொகுதி கடந்து வந்த தேர்தல்கள் ( 1977 – 2011 )

2006 - தேர்தல் ஒரு பார்வை

2011தேர்தல் ஒரு பார்வை