ராம்ராஜ் காட்டன் நிறுவனத்துடன் இணைந்து ‘இந்து தமிழ் திசை’ வழங்கும் ‘அன்பாசிரியர்’ விருதுக்கு இணையவழியில் நேர்காணல் நடத்திய நடுவர் குழுவினர்.படம்: எஸ்.சத்தியசீலன்
சென்னை: ராம்ராஜ் காட்டன் நிறுவனத்துடன் இணைந்து ‘இந்து தமிழ் திசை’ நாளிதழ் வழங்கும் ‘அன்பாசிரியர்’ விருதுக்காக இணையவழியில் நடத்தப்பட்ட நேர்காணலில் ஆசிரியர்கள் ஆர்வத்தோடு பங்கேற்றனர்.
மாணவர்களுக்கு தனித்துவமிக்க கல்வியை அளிப்பதுடன், மாறுபட்ட சிந்தனையுடன் செயல்பட்டு பள்ளிக்குப் பெருமை சேர்க்கும் அர்ப்பணிப்பு மிக்க அரசு, அரசு உதவிபெறும் பள்ளிகள், தனியார் பள்ளிகளின் ஆசிரியர்களை கவுரவிக்கும் வகையில் ‘இந்து தமிழ் திசை’ நாளிதழ் சார்பில் ‘அன்பாசிரியர்’ விருது கடந்த 2020-ம் ஆண்டு முதல் வழங்கப்பட்டு வருகிறது.
அந்த வகையில், 6-வது முறையாக ‘அன்பாசிரியர்’ விருதுகளை ராம்ராஜ் காட்டன் நிறுவனத்துடன் சேர்ந்து இந்து தமிழ் திசை நாளிதழ் இந்த ஆண்டும் வழங்க உள்ளது. இந்த நிகழ்வின் பங்குதாரர்களாக ராஜலட்சுமி பொறியியல் கல்லூரி, பொன்வண்டு மேட்டிக் லிக்யூடு, மதுரை சாந்தாஸ் சில்க்ஸ், பிஎஸ்ஆர் சில்க்ஸ் சாரீஸ், இந்திய ஆயுள் காப்பீட்டுக் கழகம் (எல்ஐசி) ஆகியவை இணைந்துள்ளன.
2026-ம் ஆண்டுக்கான அன்பாசிரியர் விருதுக்கு தமிழகம், புதுச்சேரியில் உள்ள 40 மாவட்டங்களில் இருந்து 450-க்கும் மேற்பட்ட ஆசிரியர்கள் விண்ணப்பித்தனர். அதில் முதல்கட்டமாக தேர்வான மதுரை, திருச்சி மண்டலங்களை உள்ளடக்கிய மாவட்டங்களைச் சேர்ந்த ஆசிரியர்களுக்கு இணையவழியிலான நேர்காணல் நேற்று நடைபெற்றது. இதில் ஆசிரியர்கள் மிகுந்த ஆர்வத்தோடு பங்கேற்றனர்.
இந்த நேர்காணலில் தமிழ்நாடு திறந்தநிலை பல்கலைக்கழக மொழிப்புல முன்னாள் தலைவர் பாரதிபாலன், அப்பல்கலைக்கழக சிறப்பு கல்வியியல் பேராசிரியர் இரா.மு.தமிழ்செல்வன், சென்னை மாநிலக் கல்லூரி தமிழ்த் துறைப் பேராசிரியர் சு.செல்வகுமாரன், சென்னை அடையாறு பாட்ரிஷியன் கல்லூரி தமிழ்த் துறைப் பேராசிரியர் தனஞ்செயன், வடபழனி ஆவிச்சி கலை, அறிவியல் கல்லூரி தமிழ்த் துறைத் தலைவர் பிரபாவதி, கிண்டி நோய்த் தடுப்பு,
ஆய்வு நிறுவனப் பேராசிரியர் திலகவதி, ராணி மேரி கல்லூரி தமிழ்த் துறைப் பேராசிரியர் கஸ்தூரிபாய், ஸ்டெல்லா மேரீஸ் கல்லூரி சமூகப் பணித்துறைப் பேராசிரியர் மாதவி ஆகியோர் நடுவர்களாக செயல்பட்டனர்.
நேர்காணலின்போது, கற்பித்தலில் புதிய உத்திகளைப் பயன்படுத்துதல், புத்தக வாசிப்பு, மாணவர் நலன், பள்ளிகளில் மாணவர் சேர்க்கையை உயர்த்துதல், ஆரோக்கிய மேம்பாடு உட்பட பல்வேறு அம்சங்களின் அடிப்படையில் ஆசிரியர்களிடம் நடுவர்கள் கேள்விகளை முன்வைத்தனர். ஆசிரியர்களின் தனிச் சிறப்புகளையும் ஆய்வு செய்தனர். நடுவர்கள் தங்கள் அனுபவங்களை பகிர்ந்துகொண்டனர்.
அவர்கள் தெரிவித்ததாவது:
மொழிப்புல முன்னாள் தலைவர் பாரதிபாலன்: அன்பாசிரியர் விருது தேர்வுக் குழுவில் இடம்பெற்றது புதிய அனுபவம். ஆசிரியர்கள் நவீன அறிவியல் தொழில்நுட்பங்களைப் பயன்படுத்தி மிகச் சிறப்பாக கல்விப் பணி ஆற்றி வருகின்றனர். அவர்களது அனுபவம் ஒவ்வொன்றும் ஒரு புதிய கல்விக்கான கதவுகளை திறந்துவிட்டதுபோல இருந்தது.
பேராசிரியர் மாதவி: நேர்காணலின்போது, கேள்வி கேட்க கேட்க, பல ஆசிரியர்கள் விளக்கமாக பதில் அளித்தது ஆச்சரியமாக இருந்தது. அவர்கள் அனுபவப்பூர்வமாக பேசியதை உணர முடிந்தது. ஆசிரியர்களாக இருந்தாலும் பல ஆராய்ச்சிகளில் ஈடுபட்டுள்ளனர். நூல்களை வெளியிட்டுள்ளனர். புதிய மென்பொருள்களை பயன்படுத்துகின்றனர். அவர்களை மேலும் ஊக்குவிக்க வேண்டும்.
பேராசிரியர் தனஞ்செயன்: விருதுக்கு வரும் விண்ணப்பங்களைப் பார்த்தே அன்பாசிரியர் விருது எந்த அளவுக்கு ஆசிரியர்களை சென்றடைந்துள்ளது என்பதை உணரலாம். ஆசிரியர்கள் பாடத்தைத் தாண்டி எவ்வளவு விஷயங்களை சொல்லித் தருகின்றனர் என்பதை நேர்காணலில் அறிய முடிந்தது.
பேராசிரியர் திலகவதி: ஆசிரியர்களின் பல்வேறு செயல்பாடுகள், அறிவாற்றல் என பல அம்சங்களையும் மதிப்பிட்டு வழங்கப்படும் விருது இது. கற்பித்தலில் அரசுப் பள்ளி ஆசிரியர்கள் பல்வேறு புதிய முறைகள், உத்திகளையும் பயன்படுத்துவதை அறிய முடிந்தது. இவ்வாறு அவர்கள் தெரிவித்தனர்.
மதுரை, திருச்சியை தொடர்ந்து, சென்னை, கோவை மண்டலங்களுக்கு உட்பட்ட மாவட்டங்களைச் சேர்ந்த ஆசிரியர்களுக்கான இணையவழி நேர்காணல் ஆக.22-ம் தேதி நடைபெற உள்ளது. நேர்காணல் முடிவுகள் விரைவில் வெளியிடப்படும். தேர்வான ஆசிரியர்களுக்கு சென்னை தியாகராய நகர் வாணி மகாலில் ஆக.29-ம் தேதி நடைபெறும் விழாவில் பள்ளிக்கல்வி அமைச்சர் ராஜ்மோகன் ‘அன்பாசிரியர்’ விருதுகளை வழங்கிச் சிறப்பிக்கிறார்.
