ஆம்பலாபட்டு இலுப்பைதோப்பு கிராமத்தில் உள்ள அரசு மேல்நிலைப் பள்ளியில் ரூ.65 லட்சத்தில் கட்டப்பட்டு வரும் கலையரங்கம். | முன்னாள் மாணவர் வாஞ்சிநாதன்.
தஞ்சாவூர்: தஞ்சாவூர் மாவட்டம் ஒரத்தநாடு அருகே, தான் படித்த அரசுப் பள்ளிக்கு ரூ.4 கோடி மதிப்பில் வளர்ச்சிப் பணிகளை முன்னாள் மாணவர் செய்து தந்துள்ளார்.
ஒரத்தநாடு அருகேயுள்ள ஆம்பலாப்பட்டு இலுப்பை தோப்பு கிராமத்தைச் சேர்ந்தவர் வாஞ்சிநாதன் (42). இவர், தான் படித்த இலுப்பைதோப்பு அரசு மேல்நிலைப் பள்ளியின் வளர்ச்சிக்காக ரூ.4 கோடி நிதி வழங்கியுள்ளார்.
அந்த நிதியில் முதற்கட்டமாக ரூ.65 லட்சத்தில் மேற்கூரையுடன் கூடிய கலையரங்கம் கட்டப்பட்டு வருகிறது. எஞ்சிய நிதியில் வகுப்பறைகள், ஸ்மார்ட் கிளாஸுக்கு தேவையான சாதனங்களை வாங்க திட்டமிடப்பட்டுள்ளது. இதற்காக வாஞ்சிநாதனை அக்கிராம மக்கள் பாராட்டியுள்ளனர்.
இதுகுறித்து ஓய்வு பெற்ற அப்பள்ளி ஆசிரியர் ராமலிங்கம் கூறியது: பள்ளியில் தற்போது 400 மாணவர்கள் படித்து வருகின்றனர். பள்ளியின் உட்கட்டமைப்பு வசதியை மேம்படுத்தும் வகையில் முன்னாள் மாணவர்கள் ஏராளமான உதவிகளைச் செய்துள்ளனர்.
பள்ளிக்கு மாணவர் களை அழைத்து வர வாகன வசதி, கண்காணிப்பு கேமராக்கள், வகுப்பறை கட்ட நிலம் ஆகியவற்றை வழங்கியுள்ளனர்.
இந்நிலையில், வாஞ்சிநாதன் தான் படித்த பள்ளியை தனியார் பள்ளிக்கு நிகராக மேம்படுத்தும் நோக்கில் ரூ.4 கோடி வழங்கியுள்ளார். முதற்கட்டமாக கலையரங்கம் கட்டப்பட்டு வருகிறது.
அதைத்தொடர்ந்து, கிராமப்புற மாண வர்களின் வசதிக்காக பேருந்து வாங்கவும், 4 அறைகள் கொண்ட கூடுதல் வகுப்பறை கள் கட்டவும், அனைத்து வகுப்புகளுக்கும் ஸ்மார்ட் கிளாஸ் ஏற்படுத்தவும் திட்டமிட்டு பணிகள் நடைபெற்று வருகின்றன. பள்ளியின் முன்னாள் மாணவர்கள் பலரும், பள்ளிக்கு உதவி செய்துள்ளனர். பள்ளி வளர்ச்சி அடைந்து, மாணவர் சேர்க்கை அதிகரித்துள்ளது என்றார்.
