கோப்புப் படம்
சென்னை: முதுகலை பட்டப்படிப்புக்கான ‘கியூட்' நுழைவுத்தேர்வு முடிவுகள் இணையதளத்தில் வெளியிடப்பட்டுள்ளதாக தேசிய தேர்வு முகமை அறிவித்துள்ளது.
மத்திய அரசு பல்கலைக்கழகங்கள் மற்றும் நிகர்நிலை பல்கலைக்கழகங்களில் முதுகலை பட்டப்படிப்பு மாணவர் சேர்க்கைக்கு 'கியூட்' நுழைவுத்தேர்வு (பிஜி) நடத்தப்படுகிறது. இத்தேர்வை மத்திய கல்வி அமைச்சகத்தின் தேசிய தேர்வு முகமை (என்டிஏ) ஆண்டுதோறும் நடத்தி வருகிறது.
அந்த வகையில் 2026-27-ம் கல்வி ஆண்டு மாணவர் சேர்க்கைக்கான கியூட் (பிஜி) நுழைவுத்தேர்வு கடந்த மார்ச் மாதம் நடத்தப்பட்டது. மொத்தம் 157 பாடப்பிரிவுகளுக்கு கணினி வழியில் நடத்தப்பட்ட தேர்வை நாடு முழுவதும் 3 லட்சத்து 45 ஆயிரத்துக்கும் மேற்பட்ட மாணவ-மாணவிகள் எழுதினர்.
இந்நிலையில் கியூட் நுழைவுத்தேர்வு முடிவுகளை என்டிஏ இணையதளத்தில் (www.exams.nta.nic.in/ceut-pg) வெளியிடப்பட்டு உள்ளது. தேர்வர்கள் இணையதளத்தில் தங்கள் விண்ணப்ப எண் மற்றும் பிறந்த தேதியை குறிப்பிட்டு மதிப்பெண் சான்றிதழை பதிவிறக்கம் செய்துகொள்ளலாம் என என்டிஏ அறிவித்துள்ளது.
