சென்னை: பொங்கல் பண்டிகையன்று நடைபெறவிருந்த சிஏ தேர்வு ஜனவரி 19-ம் தேதிக்கு தள்ளிவைக்கப்படுவதாக ஐசிஏஐ நிறுவனம் அறிவித்துள்ளது.
இந்திய பட்டயக் கணக்காளர் நிறுவனம் (ஐசிஏஐ) சார்பில் சிஏ எனும் பட்டயக் கணக்காளர் பணித்தேர்வு ஆண்டுதோறும் ஜனவரி, மே மற்றும் செப்டம்பர் மாதங்களில் நடத்தப்படுகிறது. இத்தேர்வு அடிப்படை, இடைநிலை, இறுதி என 3 நிலைகளாக நடத்தப்படுகின்றன. அதில் தேர்ச்சி பெறுபவர்கள் மட்டுமே ஆடிட்டராக முடியும். அந்த வகையில் 2026-ம் ஆண்டுக்கான சிஏ தேர்வுகள் ஜனவரியில் நடைபெறவுள்ளன.
இதற்கிடையே இடைநிலை தேர்வில் குரூப்-2 பகுதியானது ஜனவரி 15-ம் தேதி நடத்தப்படும் என்று முதலில் அறிவிக்கப்பட்டது. அன்றைய தினம் பொங்கல் பண்டிகை என்பதால், சிஏ தேர்வு தேதியை மாற்ற வேண்டுமென கோரிக்கை எழுந்தது. இந்நிலையில் ஜனவரி 15-ல் நடைபெறுவதாக இருந்த சிஏ தேர்வு தள்ளிவைக்கப்பட்டுள்ளது.
இதுகுறித்து ஐசிஏஐ நிறுவனம் வெளியிட்ட அறிவிப்பில், ``மகாராஷ்டிரா மாநிலத்தில் ஜனவரி 15-ம் தேதி நகராட்சித் தேர்தல் நடைபெற உள்ளது. அதனால் அன்றைய தினம் நடைபெறுவதாக இருந்த சிஏ தேர்வு, நாடு முழுவதும் ஜனவரி 19-ம் தேதி நடத்தப்படும். தேர்வு நேரத்தில் எந்தவித மாற்றமும் இல்லை. மற்ற தேர்வுகளும் திட்டமிட்டபடி நடைபெறும்'' எனக் கூறப்பட்டுள்ளது. ஆனால் ஐசிஏஐ அறிவிப்பில் பொங்கல் பண்டிகை குறித்த தகவல் இடம்பெறாதது தமிழர்களிடம் அதிருப்தியை ஏற்படுத்தியுள்ளது.
