புரிந்துணர்வு ஒப்பந்தங்களைப் பரிமாறிக்கொண்ட பிட்ஸ் பிலானி துணைவேந்தர் வி.ராமகோபால் ராவ், சென்னை ஐஐடி இயக்குநர் வீ.காமகோடி.
சென்னை: கல்வி, மாணவர் பரிமாற்றம் மற்றும் கூட்டு ஆராய்ச்சி தொடர்பாக சென்னை ஐஐடி-யுடன் பிட்ஸ் பிலானி கல்வி நிறுவனம் புரிந்துணர்வு ஒப்பந்தம் செய்துள்ளது.
இந்தியாவில் உள்ள முன்னணி தொழில்நுட்பக்கல்வி நிறுவனங்களில் ஒன்றான பிட்ஸ் பிலானி நிறுவனம், கல்வி, ஆராய்ச்சி, மாணவர் பரிமாற்றம் தொடர்பாக சென்னை ஐஐடி-யுடன் புரிந்துணர்வு ஒப்பந்தம் செய்துள்ளது.
சென்னை ஐஐடியில் செவ்வாய்க்கிழமை நடைபெற்ற நிகழ்ச்சியில் பிட்ஸ் பிலானி துணைவேந்தர் வி.ராமகோபால் ராவ், ஐஐடி இயக்குநர் வீ.காமகோடி ஆகியோர் ஒப்பந்த ஆவணங்களை பரஸ்பரம் பரிமாறிக்கொண்டனர்.
இந்த புரிந்துணர்வு ஒப்பந்தம் 5 ஆண்டுகள் அமலில் இருக்கும். அதன்படி, பிட்ஸ் பிலானி மாணவர்கள் குறிப்பிட்ட காலம் சென்னை ஐஐடியில் கல்வி பயில்வதுடன் ஆராய்ச்சி பணியிலும் ஈடுபடலாம்.
புராஜெக்ட் ஒர்க் பணியையும் மேற்கொள்ளலாம். அதேபோல், ஐஐடி மாணவர்கள் பிட்ஸ் பிலானியில் படிக்கலாம். ஆராய்ச்சி பணிகளை மேற்கொள்ளலாம். இதற்காக இரு கல்வி நிறுவனங்களின் மாணவர்களும் எவ்வித கூடுதல் கல்விக்கட்டணம் ஏதும் செலுத்த தேவையில்லை.
புரிந்துணர்வு ஒப்பந்தம் தொடர்பாக ஐஐடி இயக்குநர் காமகோடி கூறுகையில், “வளர்ந்து வரும் புதிய தொழில்நுட்பங்கள் முதல் சுகாதார முயற்சிகள் வரை பல்வேறு துறைகளில் இரு கல்வி நிறுவனங்களும் இணைந்து செயல்பட முன்வந்திருப்பது மகிழ்ச்சி அளிக்கிறது.
இதனால் இரு நிறுவனங்களும் பல்வேறு நடைமுறைகளில் பயன்பெறும். கல்வி மற்றும் ஆராய்ச்சி வளங்களை பரஸ்பரம் பயன்படுத்திக்கொள்வதால் ஆசிரியர்களும், மாணவர்களும் பெரிதும் பயன்பெறுவர்” என்றார்.
