10-ம் வகுப்பு பொதுத் தேர்வில் மாநகராட்சி பள்ளிகளில் 79% பேர் தேர்ச்சி: கடந்த ஆண்டைவிட 3.5% அதிகம்

சென்னை: சென்னை மாநகராட்சி பள்ளிகளில் 10-ம் வகுப்பு பொதுத் தேர்வில் 79.60 சதவீதம் மாணவ,மாணவியர்கள் தேர்ச்சி பெற்றுள்ளனர்.

இது தொடர்பாக சென்னை மாநகராட்சி வெளியிட்ட செய்திக்குறிப்பில் கூறியிருப்பதாவது: சென்னை மாநகராட்சி கல்வித்துறையின் கீழ் 32 மேல்நிலைப் பள்ளிகளும், 38 உயர்நிலைப் பள்ளிகளும் செயல்பட்டு வருகின்றன.

79.60 சதவீதம் தேர்ச்சி: 2022-2023 கல்வியாண்டில் நடைபெற்ற 10-ம் வகுப்பு அரசுபொதுத்தேர்வில் 3 ஆயிரத்து 538 மாணவர்கள், 3 ஆயிரத்து 375 மாணவியர்கள் என மொத்தம் 6 ஆயிரத்து 913 பேர் தேர்வுஎழுதினர். இதில் 2 ஆயிரத்து 622 மாணவர்கள், 2 ஆயிரத்து 881 மாணவியர்கள் எனமொத்தம் 5 ஆயிரத்து 503 பேர்(79.60 சதவீதம்) தேர்ச்சிப் பெற்றுள்ளனர். இது கடந்த ஆண்டை விட 3.5 சதவீதம் அதிகமாகும்.

பாடவாரியான தேர்ச்சி விகிதத்தில் கணிதத்தில் 2 மாணவியரும், அறிவியலில் ஒரு மாணவியும் நூற்றுக்கு 100 மதிப்பெண்கள் பெற்றுள்ளனர். மேலும், 12 மாணவர்கள் 99 மதிப்பெண்கள் பெற்றுள்ளனர். 50 பேர் 451-க்கு மேலும், 305 பேர் 401-லிருந்து 450 வரையும், 704 பேர் 351-லிருந்து 400 வரையும் மதிப்பெண்கள் பெற்றுள்ளனர்.

500-க்கு 493 மதிப்பெண்கள்: புல்லா அவென்யூ, மாநகராட்சி பெண்கள் மேல்நிலைப்பள்ளி 500-க்கு 493 மதிப்பெண்கள் பெற்று முதலிடத்தையும், மார்க்கெட் தெரு மற்றும் பந்தர் கார்டன் மாநகராட்சி பெண்கள் மேல்நிலைப்பள்ளி 500-க்கு 475 மதிப்பெண்களும் பெற்று 2-ம் இடத்தையும், கோயம்பேடு மாநகராட்சி பெண்கள் மேல்நிலைப்பள்ளி 500-க்கு 474 மதிப்பெண்கள் பெற்று 3-ம் இடத்தையும் பிடித்துள்ளன. தேர்ச்சி விகிதத்தின் அடிப்படையில் ரங்கராஜபுரம் மற்றும் ஆயிரம் விளக்கு மாநகராட்சி உயர்நிலைப் பள்ளிகள் 100 சதவீதம் தேர்ச்சி வழங்கியுள்ளன. இவ்வாறு செய்திக்குறிப்பில் கூறப்பட்டுள்ளது.