நாசா காலண்டரில் இடம்பெற்ற பழநி மாணவியின் ஓவியம்

பழநி: நாசா காலண்டரில் பழநி அருகேயுள்ள  வித்யா மந்திர் பள்ளி 6-ம் வகுப்பு மாணவி அ.தித்திகாவின் ஓவியம் இடம் பெற்றுள்ளது.

அமெரிக்க விண்வெளி ஆராய்ச்சி நிறுவனமான நாசா, ஆண்டுதோறும் காலண்டர் வெளியிடுகிறது. இதற்காக சர்வதேச அளவில் ஓவியப்போட்டிகளை நடத்துகிறது. இதில் தேர்வு செய்யப்படும் ஓவியங்கள் காலண்டரில் இடம் பெறும். 2023-ம் ஆண்டு காலண்டருக்கான ஓவியங்களை தேர்வு செய்ய நடந்த போட்டியில் பல்வேறு நாடுகளை சேர்ந்த 25,000-க்கும் மேற்பட்ட மாணவர்கள் கலந்து கொண்டனர்.

இதில் இந்தியாவில் இருந்து 9 ஓவியங்கள் தேர்வு செய்யப்பட்டன. இப்போட்டியில் பங்கேற்ற பழநி அருகேயுள்ள ஸ்ரீ வித்யாமந்திர் பள்ளி 6-ம் வகுப்பு மாணவி தித்திகாவின் ஓவியம் மார்ச் மாத காலண்டர் பக்கத்தில் இடம் பெற்றுள்ளது. அம்மாணவியை பள்ளி தாளாளர் வீரா எஸ்.டி. சாமிநாதன், இயக்குநர் கார்த்திகேயன், முதல்வர் வசந்தா மற்றும் ஆசிரியர்கள் பாராட்டினர்.