தமிழகம் முழுவதும் பிளஸ் 2 செய்முறை தேர்வு தொடங்கியது: பிப்ரவரி 14 வரை நடைபெறுகிறது

பிளஸ் 2 மாணவர்களுக்கான செய்முறை தேர்வு மாநிலம் முழுவதும் நேற்று தொடங்கியது.

தமிழக பள்ளிக்கல்வி பாடத் திட்டத்தில் 10-ம் வகுப்பு, பிளஸ் 1, பிளஸ் 2 ஆகிய வகுப்புகளுக்கான பொதுத் தேர்வு மார்ச் 3 முதல் ஏப்ரல் 15-ம் தேதி வரை நடைபெற உள்ளது. இதற்கான இறுதிகட்ட பணிகள் தற்போது நடந்து வருகின்றன.

இந்நிலையில், தேர்வுத் துறை ஏற்கெனவே அறிவித்தபடி, பொதுத் தேர்வு எழுதவுள்ள பிளஸ் 2 மாணவர்களுக்கான செய்முறை தேர்வுகள் நேற்று தொடங்கின. இத்தேர்வு 14-ம் தேதி வரை நடைபெறுகிறது. தமிழகம் முழுவதும் 5 ஆயிரத்துக்கும் மேற்பட்ட மேல்நிலைப் பள்ளிகளில் பயிலும் சுமார் 6 லட்சம் மாணவர்கள் இதில் பங்கேற்கின்றனர்.

பள்ளிகளில் உள்ள மாணவர்கள் எண்ணிக்கைக்கு ஏற்ப சுற்றுகள் பிரிக்கப்பட்டு தேர்வுகள் நடத்தப்பட்டன. ஒரு சுற்றுக்கு அதிகபட்சம் 25-30 மாணவர்கள் அனுமதிக்கப்பட்டனர். ஆய்வகங்களில் மாணவர்களின் பாதுகாப்பை உறுதிசெய்யவும் முன்னேற்பாடுகள் செய்யப்பட்டிருந்தன.

சென்னை சைதாப்பேட்டையில் உள்ள மாநில தகைசால் பள்ளியில் பள்ளிக்கல்வித் துறை அமைச்சர் அன்பில் மகேஸ் பொய்யாமொழியும், சென்னை எம்சிசி பள்ளியில் பள்ளிக்கல்வி இயக்குநர் கண்ணப்பனும் செய்முறை தேர்வை ஆய்வு செய்தனர்.