லோகேஷ்
சென்னை: திருவொற்றியூரில், ஊசி செலுத்திய சில நிமிடங்களிலேயே இளைஞர் மரணம் அடைந்தார். இறப்புக்கு தவறான சிகிச்சை காரணமா? என போலீஸார் விசாரணை நடத்தி வருகின்றனர்.
சென்னை மாதவரம் பால்பண்ணை மூலச்சத்திரம் பகுதியைச் சேர்ந்தவர் லோகேஷ் (26). மது பழக்கத்துக்கு அடிமையானவர் என கூறப்படுகிறது. இவருக்கு கடந்த ஆண்டு திருமணம் நடைபெற்றுள்ளது.
இந்நிலையில், மது பழக்கத்திலிருந்து மீட்பதற்காக லோகேஷை அவரது பெற்றோர் கடந்த 29-ம் தேதி மூலக்கடை பகுதியில் உள்ள தனியார் மருத்துவமனையில் சேர்த்தனர். அங்கு நேற்று முன்தினம் மாலை பணியில் இருந்த செவிலியர் ஒருவர் லோகேஷுக்கு ஊசி செலுத்தி உள்ளார்.
ஊசி செலுத்திய சில நிமிடங்களிலேயே லோகேஷின் உடல்நிலை மோசமடைந்ததாக தெரிகிறது. அப்போது மருத்துவமனையில் டாக்டர்கள் யாரும் இல்லாததால், செவிலியர் ஆம்புலன்சை வரவழைத்து லோகேஷை மாதவரத்தில் உள்ள மற்றொரு தனியார் மருத்துவமனைக்கு அனுப்பி வைக்க ஏற்பாடு செய்தார்.
இதற்கிடையே அங்கு வந்த ஆம்புலன்ஸ் ஊழியர்கள் லோகேஷை பரிசோதித்துவிட்டு, அவர் ஏற்கெனவே இறந்துவிட்டதாக தெரிவித்தனர். ஆனால், லோகேஷ் உயிருடன் இருப்பதாகவும், தாங்கள் பரிசோதித்துவிட்டதாகவும் செவிலியர் கூறி, அவரை ஆம்புலன்சில் மற்றொரு மருத்துவமனைக்கு அனுப்பி வைத்துள்ளார்.
அங்கு லோகேஷை பரிசோதித்த டாக்டர்கள், அவர் ஏற்கெனவே இறந்துவிட்டதாக தெரிவித்ததுடன், அவரது உடலை மீண்டும் சம்பந்தப்பட்ட நர்சிங் ஹோமுக்கு அனுப்பி வைத்தனர்.
இதனால் ஆத்திரமடைந்த லோகேஷின் பெற்றோர் மற்றும் உறவினர்கள், மருத்துவமனை நிர்வாகத்தினருடன் வாக்குவாதத்தில் ஈடுபட்டனர். இந்த விவகாரம் தொடர்பாக கொடுங்கையூர் போலீஸார் வழக்குப் பதிவு செய்து விசாரணை நடத்தி வருகின்றனர்.
