காஞ்சிபுரம்: காஞ்சிபுரம் மாவட்டத்தில் உள்ள டாஸ்மாக் கடைகளில் வாரந்தோறும் தனியார் வங்கி முகவர்கள் மூலம் விற்பனைத் தொகை வசூலிக்கப்படுகிறது. இதன்படி சென்னையைச் சேர்ந்த வங்கி முகவர் தாஸ் (52), வாடகைக் கார் ஓட்டுநர் ஹபீப் ரஹ்மான் ஆகியோர் நேற்று காஞ்சிபுரம் மாவட்டத்தில் உள்ள 20-க்கும் மேற்பட்ட டாஸ்மாக் கடைகளில் விற்பனைத் தொகையை வசூலித்துள்ளனர்.
பின்னர் வசூலான ரூ.1.5 கோடி பணத்துடன் காரில், ஒரகடம் பகுதியில் வனப்பகுதியை ஒட்டியுள்ள டாஸ்மாக் கடைக்கும் நேற்று முன்தினம் இரவு பணம் வசூலிக்கச் சென்றுள்ளனர். அப்போது தாஸ் பணம் வசூலிப்பதற்காக கடைக்குள் சென்ற நிலையில், ஓட்டுநர் ஹபீப் ரஹ்மான் காரில் தனியாக இருந்துள்ளார். அந்த நேரத்தில் இருசக்கர வாகனத்தில் வந்த மர்ம நபர்கள் காரின் பின்புறம் மோதி செயற்கையான விபத்தை ஏற்படுத்தியுள்ளனர்.
உடனே காரிலிருந்து இறங்கிய ஓட்டுநர் அவர்களிடம் வாக்குவாதத்தில் ஈடுபட்டுள்ளார். இந்தச் சந்தர்ப்பத்தைப் பயன்படுத்திக் கொண்ட மர்ம நபர்கள் அவரது கவனத்தை திசை திருப்பிவிட்டு அங்கிருந்து செல்ல முயன்றனர். அப்போது இவர் அவர்களை விரட்டிச் செல்ல இன்னொரு நபர் சுமார் ரூ.1.5 கோடி பணம் வைக்கப்பட்டிருந்த காரைக் கடத்திச் சென்றுள்ளார்.
பின்னர் சுமார் 10 கி.மீ. தொலைவில் தாம்பரம் செல்லும் வழியில் காரணித்தாங்கல் பகுதியில் உள்ள தனியார் பொறியியல் கல்லூரி அருகே காரை நிறுத்திவிட்டு, அதிலிருந்த பணத்துடன் தப்பிச் சென்றுள்ளனர். இதுகுறித்து தகவலறிந்து வந்த ஒரகடம் போலீஸார் காரை மீட்டனர். மேலும் கொள்ளையர்கள் காரின் அருகே விட்டுச் சென்றதாகக் கூறப்படும் ரூ.18 லட்சத்தையும் கைப்பற்றினர். இதுகுறித்து ஒரகடம் போலீஸார் வழக்குப் பதிவு செய்து விசாரணை நடத்தி வருகின்றனர்.
இதுகுறித்து ஓட்டுநர் ஹபீப் ரஹ்மான், வங்கி முகவர் தாஸ் ஆகியோரிடமும் விசாரணை நடத்தப்பட்டு வருகிறது.
காஞ்சிபுரம் மாவட்ட காவல் கண்காணிப்பாளர் அரவிந்த் உத்தரவின்படி கொள்ளையர்களைப் பிடிக்க பெரும்புதூர் டிஎஸ்பி கீர்த்திவாசன் தலைமையில் 5 தனிப்படைகள் அமைக்கப்பட்டுள்ளன.
