சேலம்: அரியானூர் அருகே முன்னால் சென்ற லாரியின் பின்புறத்தில் கார் மோதிய விபத்தில் நண்பர்கள் 3 பேர் உயிரிழந்தனர். மேலும் ஒருவர் காயமடைந்து சிகிச்சை பெற்று வருகிறார்.
சேலம் அம்மாப்பேட்டை பட்டைக்கோயில் பகுதியைச் சேர்ந்த விக்ரம் சூர்யா (23), பூலாம்பட்டியைச் சேர்ந்த முருகன் (41), சூரமங்கலத்தைச் சேர்ந்த கார்த்தி (35), அருண் ஆகியோர் நண்பர்கள். இவர்கள் முருகனை பூலாம்பட்டியில் விட்டுவிட்டு வருவதற்காக நேற்று முன்தினம் நள்ளிரவு ஒரே காரில் புறப்பட்டனர். காரை அருண் ஓட்டிச் சென்றார்.
சேலத்தை அடுத்த அரியானூர் அருகே சேலம் - கோவை தேசிய நெடுஞ்சாலையில் சென்றபோது, சிமென்ட் மூட்டைகளை ஏற்றிச் சென்ற லாரியின் பின்புறத்தில் கார் மோதியது. இதில் காரில் பயணம் செய்த 4 பேரும் பலத்த காயமடைந்தனர்.
விபத்து குறித்து தகவலறிந்து சம்பவ இடத்துக்கு வந்த ஆட்டையாம்பட்டி போலீஸார், காரில் சிக்கியிருந்த 4 பேரையும் மீட்டு மருத்துவமனையில் சேர்த்தனர். அங்கு விக்ரம் சூர்யா, முருகன், கார்த்தி ஆகியோர் அடுத்தடுத்து உயிரிழந்தனர். அருண் தொடர்ந்து சிகிச்சை பெற்று வருகிறார். இந்த விபத்து குறித்து போலீஸார் வழக்கு பதிவு செய்து விசாரணை நடத்தி வருகின்றனர்.
