சென்னை: வியாசர்பாடி அருகே திருவனந்தபுரம் விரைவு ரயில் மீது கல்வீசி தாக்குதல் நடத்திய வழக்கில், ஒருவரை ரயில்வே போலீஸார் கைது செய்தனர்.
சென்னை சென்ட்ரல் ரயில் நிலையத்திலிருந்து திருவனந்தபுரத்துக்கு விரைவு ரயில் கடந்த 2-ம் தேதி இரவு 7.30 மணிக்கு புறப்பட்டது.
இந்த ரயிலை ஈரோடு பிரிவைச் சேர்ந்த லோகோ பைலட் சரவணன் மற்றும் உதவி லோகோ பைலட் விதுன் ஆகியோர் இயக்கினர்.
இந்த ரயில் வியாசர்பாடி ரயில் நிலையத்தைக் கடந்து சென்று கொண்டிருந்தபோது, தண்டவாளத்தின் ஓரத்திலிருந்து மர்ம நபர் ஒருவர், ரயிலின் மீது திடீரென கற்களை வீசினார்.
இதில் ரயிலின் எஞ்சின் முன்பக்கக் கண்ணாடி பயங்கர சத்தத்துடன் உடைந்து சிதறியது. இதில், உதவி லோகோ பைலட் விதுன் தலையில் பலத்த காயம் ஏற்பட்டது.
இச்சம்பவம் குறித்து, பெரம்பூர் ரயில்வே போலீஸார் 3 பிரிவுகளின் கீழ் வழக்குப் பதிந்து, ரயில் மீது கல்வீசி தாக்குதல் நடத்திய குற்றவாளியை தேடி வந்தனர்.
முதல்கட்டமாக, சம்பவம் நடந்த இடத்தில் பதிவான சிசிடிவி காட்சிகளை ஆய்வு செய்தபோது, ஒருவர் சம்பவம் நடைபெற்ற நேரத்தில் நடந்து சென்றது தெரியவந்தது.
அந்த நபரின் அடையாளங்களை வைத்து குற்றவாளியை உறுதி செய்து, சம்பந்தப்பட்ட நபரை நேற்று கைது செய்து, பெரம்பூர் ரயில்வே காவல் நிலையத்துக்கு அழைத்து வந்தனர்.
பின்னர் அவரிடம் நடத்திய விசாரணையில், அந்த நபர் புளியந்தோப்பு குருசாமி நகரைச் சேர்ந்த முகமது சபீர் (21) என்பதும், போதையில் ரயில் மீது கல்வீசியதும் தெரியவந்தது. இதையடுத்து, அவரை கைது செய்து, நீதிமன்றத்தில் ஆஜர்படுத்தி சிறையில் அடைத்தனர்.
