பொன்னேரி: பழவேற்காட்டில் கடலூர் இளைஞரை கொலை செய்து புதைத்த வழக்கில் மேலும் ஒருவரை போலீஸார் கைது செய்தனர்.
கடலூர் மாவட்டம் சிறுவத்தூர் கிராமத்தைச் சேர்ந்த எழில்செல்வி சென்னையில் உள்ள நடிகை ராதிகா சரத்குமார் இல்லத்தில் பணிப்பெண்ணாக உள்ளார்.
இவரது மகன் பிரசாந்த் (19) கடந்த 27-ம் தேதி சென்னையில் உள்ள தனது தாயைப் பார்க்கச் செல்வதாக தாய்மாமன் ரமேஷிடம் கூறிவிட்டு கடலூரிலிருந்து வந்தார். மறுநாள் (அக்.28) அவர் மாயமானதாக கடலூர் மாவட்டம் புதுப்பேட்டை காவல் நிலையத்தில் தாய்மாமன் ரமேஷ் புகார் அளித்துள்ளார்.
இதில் போலீஸார் மேற்கொண்ட விசாரணையில், தேவராசு என்பவரின் மனைவியுடன் பிரசாந்துக்கு திருமணத்தை மீறிய உறவு இருந்தால் அவர் தனதுநண்பன் தினேஷுடன் இணைந்து பழவேற்காட்டில் பிரசாந்தை கொலை செய்தது தெரியவந்தது.
எனவே இருவரையும் போலீஸார் கைது செய்து பழவேற்காடு அழைத்து வந்து பிரசாந்தின் உடலை மீட்டனர். இதையடுத்து திருப்பாலைவனம் போலீஸார் கொலை வழக்குப் பதிவு செய்து இருவரையும் கைது செய்து தொடர் விசாரணை மேற்கொண்டனர்.
இந்த விசாரணையின்போது தேவராசுவின் மனைவி சுமித்ராவுடன் ஏற்பட்ட பழக்கத்தால் சுமித்ரா அழைப்பின் பேரில் சென்னைக்கு வந்த பிரசாந்த், கடந்த 28-ம் தேதி பழவேற்காட்டில் உள்ள தனது தோழி வீட்டுக்கு வந்துள்ளார்.
கணவரை விடுத்து வேறு ஒருவருடன் சுமித்ரா வந்ததால் அதிர்ச்சியடைந்த தோழி இது தொடர்பாக சுமித்ரா குடும்பத்துக்கு தகவல் தெரிவித்துள்ளார். உடனே சுமித்ராவின் குடும்பத்தினர் பழவேற்காடு வந்து அவரை தங்களுடன் அழைத்துச் சென்றுவிட்டனர்.
மேலும் சுமித்ராவின் கணவர் தேவராசு, அவரது நண்பர் தினேஷ், பழவேற்காட்டைச் சேர்ந்த சஞ்சய் மூவரும் இணைந்து பிரசாந்தை கொலை செய்து கடற்கரை மணல் பரப்பில் புதைத்தது தெரியவந்தது. ஏற்கெனவே இவ்வழக்கில் தேவராசு, தினேஷ் கைதான நிலையில், சஞ்சயையும் திருப்பாலைவனம் போலீஸார் கைது செய்தனர்.
