போக்ஸோ வழக்கில் 2 இளைஞர்களுக்கு 10 ஆண்டு சிறை: ஸ்ரீவில்லிபுத்தூர் நீதிமன்றம் தீர்ப்பு

ஸ்ரீவில்லிபுத்தூர்: சிறுமிக்கு பாலியல் தொல்லை அளித்த 2 இளைஞர்களுக்கு 10 ஆண்டுகள் சிறைத் தண்டனை விதித்து ஸ்ரீவில்லிபுத்தூரில் உள்ள மாவட்ட போக்ஸோ நீதிமன்றம் தீர்ப்பளித்தது. விருதுநகர் பகுதியைச் சேர்ந்தவர் பால்பாண்டி( 21). பெயின்ட் அடிக்கும் வேலை செய்கிறார். இவரது நண்பர் திருக்குமரன்(20). பொறியியல் பட்டதாரி. இருவரும் கடந்த 2015-ம் ஆண்டில் 14 வயது சிறுமிக்கு பாலியல் தொல்லை அளித்தனர். இதுகுறித்த புகாரின் பேரில் விருதுநகர் அனைத்து மகளிர் போலீஸார் போக்ஸோ வழக்கில் இருவரையும் கைது செய்தனர். இந்த வழக்கு விசாரணை வில்லிபுத்தூரில் உள்ள மாவட்ட போக்ஸோ நீதிமன்றத்தில் நடைபெற்று வந்தது. பால்பாண்டி, திருக்குமரன் ஆகிய இருவருக்கும் 10 ஆண்டுகள் சிறைத் தண்டனை மற்றும் தலா ரூ.10 ஆயிரம் அபராதம் விதித்து நீதிபதி பூர்ணஜெய ஆனந்த் தீர்ப்பளித்தார்.