தமிழகத்துக்கு கடத்தி வரப்பட்ட 1.914 கிலோ கிராம் தங்கத்தை பறிமுதல் செய்த இலங்கை கடற்படை

ராமநாதபுரம்: இலங்கையில் இருந்து தமிழகத்துக்கு கடத்தி வரப்பட்ட 1.914 கிலோ கிராம் தங்கத்தை அந்நாட்டுக் கடற்படை பறிமுதல் செய்தது. இது தொடர்பாக மன்னாரைச் சேர்ந்த 3 பேர் கைது செய்யப்பட்டனர்.

இலங்கையின் தலை மன்னாரில் இருந்து கடல் வழியாக தமிழகத்துக்கு தங்கம் கடத்தப்படுவதாக வந்த தகவலையடுத்து இலங்கை கடற்படையினர் தீவிரமாக கண்காணித்து வந்தனர்.

தமிழகத்தை நோக்கி வேகமாகச் சென்ற ஒரு இலங்கை படகை நடுக்கடலில் பிடித்து சோதனை செய்தனர். அவர்கள் தங்கம் கடத்துவது தெரிய வந்தது. இதையடுத்து படகில் இருந்த மன்னாரைச் சேர்ந்த இல்ஷாத் அலி, கிரியக்சன் துரன், ஜாஃப்ரான் ஆகியோரை கைது செய்தனர். அவர்களிடம் இருந்து 1.914 கிலோ கிராம் தங்கத்தை இலங்கை கடற்படையினர் பறிமுதல் செய்தனர்.