ஈரோடு: ஈரோட்டில் ‘டிஜிட்டல் கைது’ செய்வதாக மிரட்டி ரூ.48 லட்சம் மோசடி செய்த மர்ம நபரை சைபர் க்ரைம் போலீஸார் தேடி வருகின்றனர்.
ஈரோடு கச்சேரி வீதியைச் சேர்ந்தவர் தேவிபிரசாத். கடந்த சில நாட்களுக்கு முன்பு அவரது ‘வாட்ஸ்அப்’ எண்ணுக்கு வந்த அழைப்பில் பேசிய நபர், தன்னை சிபிஐ அதிகாரி என அறிமுகப்படுத்திக் கொண்டார். தேவிபிரசாத்தின் அடையாள அட்டையைப் பயன்படுத்தி பல சிம்கார்டுகள் வாங்கி மோசடியில் ஈடுபட்டுள்ளதாகவும், இதற்காக அவரை ‘டிஜிட்டல் கைது’ செய்வதாகவும் மிரட்டியுள்ளார்.
மேலும், வழக்கில் இருந்து விடுவிக்க ரூ.48 லட்சம் கேட்டுள்ளார். இதை நம்பிய தேவிபிரசாத், கடந்த 8-ம் தேதி முதல் 20-ம் தேதி வரை பல்வேறு தவணைகளில் ஆர்டிஜிஎஸ் மூலம் ரூ.48 லட்சம் அனுப்பியுள்ளார். பின்னர் இது மோசடி என தெரியவந்தது. இதையடுத்து, ஈரோடு சைபர் க்ரைம் காவல் நிலையத்தில் புகார் அளித்தார். அதன்பேரில் போலீஸார் வழக்குப் பதிவு செய்து மர்ம நபரைத் தேடி வருகின்றனர்.
