திரைப்படங்களில் அதிரடிச் சண்டைக் காட்சிகள் (Action Sequences) பார்வையாளர்களை இருக்கையின் நுனிக்கே கொண்டு செல்லும். ஒரு சண்டைப் பயிற்சியாளர் ஆபத்தான செயல்களை பாதுகாப்புடன், அழகியலுடன், கதையின் தேவைக்கேற்ப வடிவமைக்கும் படைப்பாளி.
சண்டைக் காட்சியின் வடிவமைப்பு திரைக்கதையை வாசிப்பதிலிருந்தே தொடங்குகிறது. கதாபாத்திரத்தின் வயது, உடல் திறன், உணர்ச்சி, சமூகப் பின்னணி, பயன்படுத்தப்படும் ஆயுதங்கள், காட்சியின் இடம், காலநிலை போன்ற அனைத்தையும் ஆராய்ந்து சண்டையின் பாணியைத் தீர்மானிக்கிறார் ஸ்டன்ட் கொரியோகிராஃபர்.
ஒரு காவல்துறை அதிகாரியின் சண்டையும் குத்துச்சண்டை வீரரின் சண்டையும் கிராமத்து இளைஞரின் சண்டையும் ஒரே மாதிரியாக இருக்க முடியாது. ஒவ்வொரு கதாபாத்திரத்துக்கும் தனித்துவமான உடல் மொழியை உருவாக்குவதே சிறந்த சண்டைப் பயிற்சியாளரின் அடையாளம்.
சண்டைக் காட்சி வெற்றிகரமாக அமைய, சண்டைப் பயிற்சியாளரின் உடல்சார் வலிமை மட்டும் போதாது; அதை வேகத்தோடும் வீரியத்தோடும் திரையில் கடத்தும் ஒளிப்பதிவாளரின் காட்சி மொழியும் மிக அவசியம். சண்டைப் பயிற்சியாளர் ஆபத்தையும் அசைவுகளையும் தீர்மானிக்கிறார்; ஒளிப்பதிவாளர் அந்த அசைவுகளுக்கு வேகம், அழுத்தம், மற்றும் காட்சி அழகியலை வழங்குகிறார்.
அதிரடிக் காட்சிகளின் வகைகள்
இவ்வகைக் காட்சிகள் கதையின் தேவைக்கேற்ப பல்வேறு வகைகளாகப் பிரிக்கப்படுகின்றன:
துரத்தல் காட்சிகள்: வாகனத் துரத்தல் (கார்/பைக்) மற்றும் கால்நடைத் துரத்தல் (Foot Chase) என இருவகைப்படும். வாகனத் துரத்தலுக்கு எஃப்பிவி ட்ரோன்கள் மற்றும் காரின் சக்கரங்களுக்கு அருகே பொருத்தப்படும் கேமராக்கள் பயன்படுகின்றன. நெரிசலான இடங்களில் நடக்கும் கால்நடைத் துரத்தலுக்கு ஸ்டெடிகேம் மற்றும் ஹேண்ட்ஹெல்ட் கேமராக்கள் முதன்மையாகப் பயன்படுகின்றன.
சண்டைகளின் பல்வேறு வடிவங்கள்: மிக நெருக்கமான இடைவெளியில் நடக்கும் கைகலப்பு சண்டை, வாள் மற்றும் கத்திகளைப் பயன்படுத்தும் ஆயுதச் சண்டை, உடலசைவுகள் நிறைந்த தற்காப்புக் கலைச் சண்டை, மற்றும் நூற்றுக் கணக்கானோர் மோதிக்கொள்ளும் பிரம்மாண்டக் குழுச் சண்டை என சண்டைகள் பலவகைப்படும்.
உடல்சார் போராட்டக் காட்சிகள் (Struggle Sequences): இங்கு முறையான சண்டை அசைவுகள் இருக்காது. ஒருவர் மற்றவரைத் தண்ணீரில் மூழ்கடிப்பது அல்லது கழுத்தை நெரிப்பது போன்ற உயிருக்குப் போராடும் தற்காப்புப் போராட்டம் மட்டுமே இருக்கும். இதில் எக்ஸ்ட்ரீம் குளோஸ்-அப் ஷாட்கள் மூலம் கதாபாத்திரத்தின் பயத்தையும் வலியையும் ஒளிப்பதிவாளர் வெளிப்படுத்துவார்.
சண்டை இல்லாத ஆபத்தான காட்சிகள் மற்றும் ஸ்டண்ட் மாஸ்டர்
திரைப்படத்தில் அடிதடி சண்டைகள் இல்லாவிட்டாலும், ஆபத்தான வாகன ஓட்டுதல் இருந்தால் சண்டைப் பயிற்சியாளரின் வழிகாட்டுதல் நிச்சயம் தேவைப்படும். காரை அதிவேகமாகத் திருப்புவது அல்லது தலைகீழாகக் கவிழ்ப்பது போன்ற ஆபத்தான காட்சிகளைத் தொழில்முறை ஸ்டன்ட் டிரைவர்களைக் கொண்டு சண்டைப் பயிற்சியாளர் இயக்குவார். கேமரா ஆபரேட்டர் மீது கார் மோதிவிடாதவாறு தடுப்புகளை அமைப்பதும், பாதுகாப்பான தொலைவை ஒளிப்பதிவாளருடன் இணைந்து கணக்கிடுவதும் இவரது பொறுப்பாகும்.
ஸ்டன்ட் டபுள் மற்றும் ஒளிப்பதிவு நுட்பங்கள் (Body Doubles)
ஆபத்தான ஸ்டன்டுகளில் முதன்மை நடிகருக்குப் பதிலாக ஸ்டன்ட் டபுள் கலைஞர் பயன்படுத்தப்படும்போது, அதை பார்வையாளர்கள் கண்டுபிடிக்க முடியாதவாறு மறைப்பது ஒளிப்பதிவாளரின் திறமையாகும்:
கோணங்களும் ஃபிரேமிங்கும்: ஸ்டண்ட் டபுள் நடிக்கும்போது கேமரா எப்போதும் பின்புறத்திலோ அல்லது பக்கவாட்டிலோ நிறுத்தப்படும். அந்தக் கலைஞர் காற்றில் பறந்து தரையிறங்கும் இறுதி விநாடியில் கேமராவை லேசாக நகர்த்தி, நடிகரின் முகத்தில் ஷாட்டை முடிப்பார்கள்.
ஒளியமைப்பு: வலுவான பின்புற ஒளியை வழங்கி, கலைஞரின் உடலை நிழல் வடிவமாக மாற்றுவதன் மூலமும் இருளைப் பயன்படுத்துவதன் மூலமும் ஸ்டன்ட் டபுள் கலைஞரின் முகத்தை மறைப்பார்கள்.
தொடர்ச்சி: ஸ்டன்ட் டபுள் ஷாட்டை எடுத்த பிறகு, அதே லென்ஸ் குவியலில் நடிகரின் முக பாவங்களைத் தனியாகப் படம்பிடித்து எடிட்டிங்கில் இணைப்பார்கள்.
பல கேமரா அமைப்பு
கட்டிடம் உடைவது, வாகனம் கவிழ்வது போன்ற ஆபத்தான காட்சிகளை மீண்டும் மீண்டும் படமாக்க முடியாது. அதனால் பல கேமராக்கள் பயன்படுத்தப்படுகின்றன:
A-கேமரா (Master Shot): சண்டையின் முதன்மை அசைவுகளையும், கதாநாயகனின் முகத்தையும் படம்பிடிக்கும்.
B-கேமரா (Impact Shot): அடி விழும் தருணம் அல்லது எதிர்வினையை நெருக்கமாகக் காட்டும்.
C-கேமரா (Extreme Angles): மேல் கோணத்திலோ அல்லது அதிவேக ஃபிரேம் ரேட்டிலோ காட்சிகளைப் பதிவு செய்யும்.
ஒரு கேமராவின் பார்வையில் மற்றொரு கேமரா தெரியாதவாறு கோணங்கள் துல்லியமாகத் திட்டமிடப்படும்.
ஃபிரேம் ரேட் நுட்பங்கள்
22fps (Under-Cranking): சாதாரண 24 fps-க்கு பதிலாகக் கேமராவை 22fps வேகத்தில் இயக்கும்போது, கலைஞர்களின் மெதுவான அசைவும் திரையில் மின்னல் வேகத் தாக்குதலாகத் தோன்றும். நடிகர்கள் பலமாக அடிக்காமல் பாதுகாப்பாகச் சண்டை செய்ய இது உதவுகிறது.
அதிவேக ஃபிரேம் ரேட்கள்: அடியின் கொடூரமான தாக்கத்தைக் காட்டவும், நடிகர் காற்றில் பறந்து வருவதைப் பிரம்மாண்டப்படுத்தவும் 48fps, 120fps, 250fps ஃபிரேம் ரேட்கள் பயன்படுகின்றன. ரத்தத் துளிகள், கண்ணாடிகள் நொறுங்குவது போன்றவை ஸ்லோ - மோஷனில் காட்டப்படும்போது காட்சியின் உணர்ச்சி கூடுகிறது.
தொடர் அசைவுகளும் பாதுகாப்பு மெத்தைகளும்
சண்டை என்பது ஒரு தொடர்ச்சியான இயக்கம். தாக்குபவர் மற்றும் அடி வாங்கு பவரின் திசைகள் குழப்பமடையாமல் இருக்க 180-டிகிரி விதி கடைப்பிடிக்கப்படும்.
உயரத்திலிருந்து குதிக்கும் காட்சிகளில் பாதுகாப்பு மெத்தைகள் பயன்படுத்தப்படும். அந்த மெத்தைகளைத் திரையில் மறைக்க:
லோ ஆங்கிள்/ஃபோர் க்ரவுண்ட் மாஸ்கிங்: கேமராவைக் கீழே வைத்து, முன்னணியில் உள்ள பொருள்களைக் கொண்டு மெத்தையை மறைப்பார்கள்.
டைட் ஃபிரேமிங்: கலைஞர் குதிக்கும் தருணத்தை மட்டும் காட்டி, மெத்தையில் தரையிறங்குவதற்கு முன் கட் செய்வார்கள்.
டச் ஆங்கிள்: கேமராவைச் சற்றே சாய்த்து வைப்பதன் மூலம் கீழே உள்ள பாதுகாப்பு உபகரணங்கள் ஃபிரேமுக்குள் வராமல் தடுக்கப்படும்.
சவாலான சூழல்கள்: மழையும் தீயும்
மழையில் சண்டை: இதில் தரை வழுக்கும் ஆபத்து உள்ளது. லென்ஸில் நீர் படாமல் இருக்க ‘ரெய்ன் ஸ்பின்னர்கள்’ பயன்படுத்தப்படும். பேக்-லைட் கொடுத்தால் மட்டுமே மழைத்துளிகள் திரையில் தெளிவாகத் தெரியும்.
தீக் காட்சிகள்: உடம்பில் தீப்பிடிக்கும் காட்சி களில் பாதுகாப்பு அதிகாரி அருகிலேயே இருப்பார். ஒளிப்பதிவாளர் டெலிஃபோட்டோ லென்ஸ்களைப் பயன்படுத்தித் தூரத்திலிருந்து படமாக்குவார். இது கலைஞர்களுக்குப் பாதுகாப்பைத் தருவதுடன், தீ ஜூவாலை நடிகருக்கு மிக அருகில் இருப்பது போலவும் காட்டும்.
ஒரு சண்டைக் காட்சி வன்முறையாக அல்லாமல் அழகியலாக மாறுவது சண்டைப் பயிற்சியாளரின் உடலியக்கத் திட்டமிடலிலும், ஒளிப்பதிவாளரின் காட்சி நுட்பத்திலும்தான் உள்ளது.
ஆபத்தை மறைத்து, வேகத்தைக் கூட்டி, கலைஞர்களின் பாதுகாப்பை உறுதிசெய்து, நவீன கேமராக் கருவிகளின் துணையோடு உருவாக்கப்படும்போதே அதிரடிக் காட்சிகள் சினிமாவின் உச்சகட்ட அனுபவமாக உயிர்பெறுகின்றன.
சண்டைக் காட்சிகள் வெற்றியடைவது என்பது உடற்தகுதி, குழு ஒருங்கிணைப்பு, தொழில் நுட்ப அறிவு ஆகியவை ஒன்றிணையும் போது மட்டுமே சாத்தியமாகிறது. ஒரு சிறந்த சண்டைப் பயிற்சியாளரின் வெற்றி, பார்வையாளர்களின் கைதட்டலில் மட்டுமல்ல; படப்பிடிப்பு முடிவில் அனைவரும் பாதுகாப்பாக வீடு திரும்புவதிலுமே இருக்கிறது.
சி.ஜெ.ராஜ்குமார்
(திரைப்பட ஒளிப்பதிவாளர்)
cjrdop@gmail.com
(புதன்தோறும் ஒளிகாட்டுவோம்)