திரு இயக்கத்தில் விக்ரம் நடிக்கவிருக்கும் 'கருடா' படப்பிடிப்பை 60 நாட்களில் முடிக்க திட்டமிட்டு இருக்கிறார்கள்.
ஆனந்த் ஷங்கர் இயக்கத்தில் விக்ரம், நயன்தாரா, நித்யா மேனன் உள்ளிட்ட பலர் நடித்து வரும் படம் 'இருமுகன்'. ஆர்.டி.ராஜசேகர் ஒளிப்பதிவு செய்துவரும் இப்படத்துக்கு ஹாரிஸ் ஜெயராஜ் இசையமைத்து வருகிறார். ஷபு தமீன்ஸ் தயாரித்து வரும் இப்படத்தின் படப்பிடிப்பு சென்னையில் நடைபெற்று வருகிறது.
இப்படத்தைத் தொடர்ந்து திரு இயக்கும் 'கருடா' படத்துக்கு தேதிகள் ஒதுக்கி இருக்கிறார் விக்ரம். எஸ்.எஸ்.எஃப் தயாரிப்பு நிறுவனம் இப்படத்தை தயாரிக்க இருக்கிறது.
மே மாதம் வரை 'இருமுகன்' படப்பிடிப்பு நடைபெற இருக்கிறது. அதற்குப் பிறகு ஒரு மாதம் ஒய்வு எடுக்க திட்டமிட்டு இருக்கிறார் விக்ரம். அதனைத் தொடர்ந்து 'கருடா' படப்பிடிப்பில் கலந்து கொள்ள திட்டமிட்டு இருக்கிறார் விக்ரம்.
'கருடா' படத்தின் சுமார் 50% காட்சிகள் ஓமன் நாட்டில் காட்சிப்படுத்த இருக்கிறார்கள். மீதிக் காட்சிகள் டெல்லி மற்றும் லடாக் உள்ளிட்ட பகுதிகளில் படமாக்க திட்டமிட்டு இருக்கிறார்கள். 60 நாட்களில் மொத்த படப்பிடிப்பையும் முடிக்க திட்டமிட்டு இருக்கிறது படக்குழு. இப்படத்தில் விக்ரமுக்கு நாயகியாக காஜல் அகர்வால் ஒப்பந்தமாகி இருக்கிறார்.