வெற்றிமாறன் இயக்கத்தில் உருவாகி இருக்கும் 'விசாரணை' படத்துக்கு சென்சார் அதிகாரிகள் 'யு/ஏ' சான்றிதழ் வழங்கி இருக்கிறார்கள். படம் 2016ல் வெளியாகிறது.
தினேஷ், சமுத்திரக்கனி, ஆனந்தி உள்ளிட்ட பலர் நடிக்க, வெற்றிமாறன் இயக்கத்தில் தயாராகி இருக்கும் படம் 'விசாரணை'. தனுஷ் மற்றும் வெற்றிமாறன் இணைந்து தயாரித்திருக்கிறார்கள். இப்படத்தின் அனைத்து உரிமைகளையும் லைக்கா நிறுவனம் வாங்கியிருக்கிறது. தமிழகத்தில் இன்னும் இப்படம் வெளியாகவில்லை.
படத்தின் பணிகள் அனைத்துமே முடிந்து, உலகத் திரைப்பட விழாக்களுக்கு அனுப்பினார்கள். முதலில் வெனிஸ் திரைப்பட விழாவில் திரையிட 'விசாரணை' தேர்வானது. இவ்விழாவில் திரையிட தேர்வான முதல் தமிழ் படம் 'விசாரணை' என்பது குறிப்பிடத்தக்கது. அதனைத் தொடர்ந்து பல்வேறு திரைப்பட விழாக்களில் இப்படம் திரையிடப்பட்டு வந்தது.
இந்நிலையில் இப்படத்தை திரையரங்குகளில் வெளியிடுவதற்கு என்று தனியாக எடிட்டிங் பணிகள் நடத்தி தயார் செய்தார்கள். அப்படத்தைப் பார்த்த சென்சார் அதிகாரிகள் படத்துக்கு 'யு/ஏ' சான்றிதழ் அளித்தார்கள்.
இப்படம் 2016 ஜனவரி இறுதி அல்லது பிப்ரவரி முதல் வாரத்தில் வெளியாகும் என்று தயாரிப்பாளர்களில் ஒருவரான தனுஷ் தெரிவித்தார்.