'பாஸ்கர் தி ராஸ்கல்' படத்தின் தமிழ் ரீமேக்கில் அஜித்தை நடிக்க வைக்க முயற்சிக்க இருக்கிறார்கள்.
'வேதாளம்' படத்துக்கு கிடைத்திருக்கும் வரவேற்பைத் தொடர்ந்து, சத்யஜோதி நிறுவனம் தயாரிக்கவிருக்கும் படத்தில் நடிக்க இருப்பதாக தகவல்கள் வெளியாகி இருக்கின்றன.
அந்நிறுவனம் தயாரிக்கவிருக்கும் படம் மலையாளப் படமான 'பாஸ்கர் தி ராஸ்கல்' படத்தின் ரீமேக்காக இருந்தால் நன்றாக இருக்கும் என்று நினைக்கிறது தயாரிப்பு நிறுவனம். இது குறித்து அஜித்திடம் பேச்சுவார்த்தை நடத்த இருக்கிறார்கள்.
மம்முட்டி, நயன்தாரா, ஜே.டி. சக்ரவர்த்தி உள்ளிட்ட பலர் நடிப்பில் சித்திக் இயக்கத்தில் வெளியான மலையாள படம் 'பாஸ்கர் தி ராஸ்கல்'. ஏப்ரல் 15ம் தேதி வெளியான இப்படம் வசூல் ரீதியாகவும், விமர்சன ரீதியாகவும் நல்ல வரவேற்பைப் பெற்றது.
இப்படத்தின் தமிழ் ரீமேக்கில் முதலில் ரஜினி நடிக்க விரும்பினார். ஆனால், சில தடங்கல்கள் ஏற்பட்டதால் அப்படத்தின் ரீமேக்கில் நடிக்கும் முடிவைக் கைவிட்டார். தற்போது அஜித்தை நடிக்க வைக்க முயற்சிக்க இருக்கிறார்கள்.
ஏற்கனவே, அஜித்தின் அடுத்த படத்தையும் இயக்குநர் சிவா தான் இயக்கவிருக்கிறார் என்று தகவல்கள் வெளியாகி இருக்கின்றன. 'பாஸ்கர் தி ராஸ்கல்' ரீமேக்கை அஜித்தை வைத்து சிவா இயக்குவாரா என்பது, விரைவில் நடைபெற இருக்கும் பேச்சுவார்த்தையில் தெரியவரும்.