'முண்டாசுப்பட்டி' படத்தின் இயக்குநர் ராம் தனது அடுத்த படத்தையும் சி.வி.குமார் நிறுவனத்துக்கே இயக்க ஒப்பந்தமாகி இருக்கிறார்.
விஷ்ணு, நந்திதா, முனீஸ்காந்த், காளி உள்ளிட்ட பலர் நடிப்பில் வெளியான படம் 'முண்டாசுப்பட்டி'. சியான் ரோல்டன் இசையமைத்த இப்படத்தை புதுமுக இயக்குநர் ராம் இயக்கி இருந்தார். சி.வி.குமார் தயாரித்த இப்படத்தை ஃபாக்ஸ் ஸ்டார் நிறுவனம் வெளியிட்டது.
2014ம் ஆண்டு ஜூன் மாதம் வெளியான இப்படம் விமர்சன ரீதியாகவும், வசூல் ரீதியாகவும் வரவேற்பைப் பெற்றது. அதனைத் தொடர்ந்து 'முண்டாசுப்பட்டி' 2ம் பாகம் குறித்த பேச்சுவார்த்தைகளும் எழுந்தன. ஆனால், இயக்குநர் ராம் தனது அடுத்த படத்துக்கான கதை விவாதத்தில் ஈடுபட்டு வந்தார்.
இந்நிலையில், தனது அடுத்த கதையை தயாரிப்பாளர் சி.வி.குமாரிடம் கூறியிருக்கிறார் ராம். அவருக்கு கதை பிடித்துவிட, இக்கதையையும் தனது நிறுவனத்துக்கே செய்ய ஒப்பந்தம் போட்டிருக்கிறார்கள். தற்போது நடிகர், நடிகைகள் தேர்வு மும்முரமாக நடைபெற்று வருகிறது.
இப்படம் 'முண்டாசுப்பட்டி' 2ம் பாகம் அல்ல என்றும் வேறு ஒரு கதை என்று படக்குழுவில் பணியாற்றுபவர் தெரிவித்தார்.