அனிருத் பிறந்த நாளில் வேதாளம் இசை?

அஜித் நடித்து வரும் 'வேதாளம்' படத்தின் இசையை அனிருத் பிறந்த நாளான அக்டோபர் 16-ம் தேதி வெளியிட படக்குழு திட்டமிட்டு இருக்கிறது.

அஜித், ஸ்ருதிஹாசன், லட்சுமி மேனன், ராகுல் தேவ், கபீர் சிங், வித்யூலேகா உள்ளிட்ட பலர் நடிக்கும் படத்தை இயக்கி வருகிறார் இயக்குநர் சிவா. அனிருத் இசையமைத்து வரும் இப்படத்தை ஏ.எம்.ரத்னம் தயாரித்து வருகிறார்.

தற்போது சென்னையில் உள்ள மோகன் ஸ்டூடியோவில் அஜித் நடனமாடும் பாடல் ஒன்றை படமாக்கி வருகிறார்கள். அதனைத் தொடர்ந்து ஒரு சண்டைக் காட்சி, ஒரு நாள் படப்பிடிப்பு மட்டுமே பாக்கி இருக்கிறது. இதனையும் விரைவில் முடிக்க படக்குழு திட்டமிட்டு இருக்கிறது.

ஏற்கனவே படத்தின் முதல் பாதி பணிகள் அனைத்துமே முடிக்கப்பட்டு விட்டது. தற்போது இரண்டாம் பாதி பணிகள் விரைவில் முடிக்கவிருக்கிறார்கள். செப்டம்பர் 23ம் தேதி இரவு இப்படத்துக்கு 'வேதாளம்' என்று தலைப்பிடப்பட்டு இருப்பதாக படக்குழு அறிவித்து, பர்ஸ்ட் லுக் போஸ்டரும் இணையத்தில் வெளியிடப்பட்டது.

இந்நிலையில், அக்டோபர் 16-ம் தேதி இசையமைப்பாளர் அனிருத் பிறந்த நாள் என்பதால் அன்றைய தினம் படத்தின் இசையை வெளியிடலாம் என்று படக்குழு தீர்மானித்திருக்கிறது. அக்டோபர் 1-ம் தேதி படத்தின் டீஸரையும் வெளியிட திட்டமிட்டு இருக்கிறார்கள்.