லோகேஷ் கனகராஜ் படத்தைத் தொடர்ந்து விஜய் நடிக்கவுள்ள படத்தைத் தயாரிக்க சன் பிக்சர்ஸ் பேச்சுவார்த்தையில் இறங்கியுள்ளது.
லோகேஷ் கனகராஜ் இயக்கத்தில் விஜய் நடிப்பில் உருவாகும் படத்தின் படப்பிடிப்பு கர்நாடகாவில் நடைபெற்று வருகிறது. சேவியர் பிரிட்டோ தயாரித்து வரும் இந்தப் படத்தில் மாளவிகா மோகனன், விஜய் சேதுபதி, அர்ஜுன் தாஸ், சாந்தனு, வி.ஜே.ரம்யா, கெளரி கிஷன், சாந்தனு உள்ளிட்ட பலர் நடித்து வருகிறார்கள்.
இன்னும் பெயரிடப்படாத இந்தப் படத்தை 'தளபதி 64' என்று அழைத்து வருகிறது படக்குழு. இதன் படப்பிடிப்பு ஜனவரி மாத இறுதிவரை நடைபெறவுள்ளது. ஏப்ரல் வெளியீட்டுக்குத் தயாராகவுள்ளது. மேலும், விஜய் நடிப்பில் உருவாகும் 'தளபதி 65' படத்தின் இயக்குநர் யார் என்பது இன்னும் முடிவாகவில்லை
இந்தப் பட்டியலில் இருந்து வெற்றிமாறன் விலகிவிட்டார். ஏனென்றால், சூரி படத்தைத் தொடர்ந்து சூர்யா படத்தை இயக்க ஒப்பந்தமாகிவிட்டார். இதனால், விஜய்யின் அடுத்த படத்தின் இயக்குநர் யார் என்ற எதிர்பார்ப்பு நிலவி வருகிறது.
இதனிடையே, விஜய்யின் அடுத்த படமான 'தளபதி 65' படத்தைத் தயாரிக்கப் பேச்சுவார்த்தை நடத்தி வருகிறது சன் பிக்சர்ஸ். விஜய்யும் இதற்கு சம்மதம் தெரிவித்திருப்பதாகவும், விரைவில் ஒப்பந்தம் கையெழுத்தாகும் என்றும் தெரிகிறது. ஏற்கெனவே விஜய் - ஏ.ஆர்.முருகதாஸ் கூட்டணியில் உருவான 'சர்கார்' படத்தை சன் பிக்சர்ஸ் நிறுவனம் தயாரித்திருப்பது குறிப்பிடத்தக்கது.