லஷ்மண் இயக்கத்தில் ஜெயம் ரவி நடித்து வரும் 'பூமி' படத்தின் ஃபர்ஸ்ட் லுக்கை வெளியிட்டுள்ளது படக்குழு.
'கோமாளி' படத்துக்குக் கிடைத்த வரவேற்பைத் தொடர்ந்து, தனது அடுத்த படமான 'பூமி' படத்தில் கவனம் செலுத்தி வருகிறார் ஜெயம் ரவி. இந்தப் படத்தை சுஜாதா விஜயகுமார் தயாரித்து வருகிறார். இது ஜெயம் ரவியின் 25-வது படமாகும்.
ஜெயம் ரவி நடிப்பில் வெளியான 'ரோமியோ ஜூலியட்' மற்றும் 'போகன்' ஆகிய படங்களை இயக்கிய லஷ்மண் இந்தப் படத்தை இயக்கி வருகிறார். இதன் படப்பிடிப்பு முடிவடையும் தறுவாயில் உள்ளது. தற்போது இந்தப் படத்தின் ஃபர்ஸ்ட் லுக் போஸ்டரை வெளியிட்டுள்ளது படக்குழு.
விவசாயத்தை மையப்படுத்திய படம் என்பதால், விவசாயிகளுக்கு நடுவில் ஜெயம் ரவி நிற்பது போல் ஃபர்ஸ்ட் லுக் போஸ்டர் வடிவமைக்கப்பட்டுள்ளது. இதில் நாயகியாக நிதி அகர்வால், காமெடி நடிகர் சதீஷ் ஆகியோர் முக்கிய கதாபாத்திரங்களில் நடித்து வருகிறார்கள். இமான் இசையமைப்பாளராகவும், டெட்லி ஒளிப்பதிவாளராகவும் பணிபுரிந்து வருகிறார்கள்.
இந்தப் படத்தை முடித்துவிட்டு, அஹ்மத் இயக்கத்தில் உருவாகி வரும் படத்தில் கவனம் செலுத்தவுள்ளார் ஜெயம் ரவி. அதில் தாப்ஸி, ரகுமான், எம்.எஸ்.பாஸ்கர், டயானா இரப்பா உள்ளிட்ட பலர் நடித்து வருகிறார்கள். இவ்விரண்டு படங்களையும் முடித்துக் கொடுத்துவிட்டு மணிரத்னம் இயக்கத்தில் உருவாகவுள்ள 'பொன்னியின் செல்வன்' படத்தில் கவனம் செலுத்தவுள்ளார் ஜெயம் ரவி.