'தேவர் மகன்' படத்தின் 2-ம் பாகத்தையே 'தலைவன் இருக்கின்றான்' என்ற பெயரில் உருவாக்கவுள்ளார் கமல்ஹாசன்.
1992-ம் ஆண்டு சிவாஜி, கமல், ரேவதி, நாசர், கெளதமி உள்ளிட்ட பலர் நடிப்பில் வெளியான படம் 'தேவர் மகன்'. பரதன் இயக்கத்தில் வெளியான இந்தப் படம் வசூல் ரீதியாகவும், விமர்சன ரீதியாகவும் பெரும் வரவேற்பைப் பெற்றது. இந்தப் படத்தின் பெயர் வெளியான சமயத்தில் பல்வேறு சர்ச்சைகள் எழுந்தன.
இந்தப் படத்தின் 2-ம் பாகத்தை எடுக்கவுள்ளதாக பல்வேறு பேட்டிகளில் கமல் உறுதிப்படுத்தினார். அது 'தேவர் மகன் 2' என்ற பெயரில் இருக்காது என்றும் குறிப்பிட்டார். தற்போது 'தேவர் மகன் 2' கதையைத்தான் 'தலைவன் இருக்கின்றான்' என்ற பெயரில் உருவாக்க கமல் திட்டமிட்டு இருப்பதாகத் தகவல் வெளியாகியுள்ளது.
'தேவர் மகன்' கதைப்படியே, இந்தப் படத்திலும் வடிவேலு இருக்க வேண்டும் என்று அவரிடம் பேச்சுவார்த்தை நடத்தியுள்ளார் கமல். அவரும் தனக்கு பெரும் திருப்புமுனை ஏற்படுத்திய படம் என்பதால், சம்மதம் தெரிவித்துள்ளதாகத் தெரிகிறது.
முதல் பாகத்துக்கு இளையராஜா இசையமைத்திருந்தார். தற்போது 'தலைவன் இருக்கின்றான்' படத்துக்கு ஏ.ஆர்.ரஹ்மான் இசையமைப்பாளராக ஒப்பந்தம் செய்யப்பட்டுள்ளார். தனது அரசியல் பயணத்துக்கு இந்தப் படத்தின் கதை பொருத்தமாக இருக்கும் என முடிவு செய்துள்ளார் கமல்.
'இந்தியன் 2' படத்தை முடித்தவுடன், 'தலைவன் இருக்கின்றான்' படத்தின் படப்பிடிப்பைத் தொடங்க ஆயத்தமாகி வருகிறார்கள். இதையும் லைகா நிறுவனமே தயாரிக்க முன்வந்துள்ளது.