லோகேஷ் கனகராஜ் இயக்கத்தில் விஜய் நடித்து வரும் படத்தில் இயக்குநர் ரத்னகுமாரும் பணிபுரிந்து வருகிறார்.
'பிகில்' படத்தைத் தொடர்ந்து விஜய் நடிக்கும் படத்தின் படப்பிடிப்பு சென்னையில் தொடங்கி நடைபெற்று வருகிறது. 'தளபதி 64' எனத் தற்போதைக்கு அழைக்கப்பட்டு வரும் இந்தப் படத்தை லோகேஷ் கனகராஜ் இயக்கி வருகிறார். சேவியர் பிரிட்டோ தயாரித்து வருகிறார்.
விஜய் சேதுபதி, ஆண்டனி வர்கீஸ், மாளவிகா மோகனன் உள்ளிட்ட பலர் விஜய்யுடன் நடித்து வருகிறார்கள். அனிருத் இசையமைக்க, சத்யன் சூரியன் ஒளிப்பதிவு செய்து வருகிறார். இந்தப் படத்தின் திரைக்கதையில் லோகேஷ் கனகராஜுக்கு உதவி செய்துள்ளார் இயக்குநர் ரத்னகுமார்.
'மேயாத மான்' மற்றும் 'ஆடை' படங்கள் இயக்கியதன் மூலமாகப் பிரபலமானவர் இயக்குநர் ரத்னகுமார். 'தளபதி 64' படத்தில் பணிபுரிவது குறித்து தனது ட்விட்டர் பதிவில் ரத்னகுமார், "இதை என்னால் நம்ப முடியவில்லை. கூடுதல் திரைக்கதை ஆசிரியராகத் தளபதி விஜய் உடனும், அன்பு நண்பர் லோகேஷுடனும் இணைகிறேன். நன்றி மச்சி. சக எழுத்தாளர் பொன் பார்த்திபனுக்கும் நன்றி. என்னை இழுத்துவந்த ஜெகதீஷ் அண்ணனுக்கும் நன்றி" என்று குறிப்பிட்டுள்ளார்.
ஒரே கட்டமாகப் படப்பிடிப்பை முடித்து, 2020-ம் ஆண்டு கோடை விடுமுறைக்கு வெளியிடப் படக்குழு தீர்மானித்துள்ளது. கல்லூரிப் பேராசிரியராக விஜய்யும், கல்லூரி மாணவராக சாந்தனுவும் நடித்து வருகிறார்கள். இதில் இன்னும் பல்வேறு நடிகர்கள் நடிக்க ஒப்பந்தம் செய்யப்பட்டுள்ளதாகவும், விரைவில் ஒவ்வொன்றாக அறிவிக்கவுள்ளதாகவும் படக்குழுவினர் தெரிவித்தனர்.