தமிழ் இயக்குநர்களை வைத்து ஆந்தாலஜி திரைப்படம் எடுக்க நெட்ஃப்ளிக்ஸ் நிறுவனம் திட்டமிட்டுள்ளது.
ஸ்ட்ரீமிங் தளங்கள் இந்தியாவில் பிரபலமாகி வரும் வேளையில், சர்வதேச அளவில் மிகப்பெரிய ஸ்ட்ரீமிங் நிறுவனமான நெட்ஃபிளிக்ஸ், தங்கள் தளத்தில் வளர்ந்து வரும் தமிழ் ரசிகர் கூட்டத்தைக் குறி வைத்துப் புதிய திரைப்படங்கள் எடுக்கத் தயாராகி வருகிறது.
நெட் ஃபிளிக்ஸைப் பொறுத்தவரை இது புதிதல்ல. பிரபல ஹாலிவுட் இயக்குநர்கள் பலரை வைத்து திரைப்படங்கள் எடுத்து அதை தங்களது தளத்தில் மட்டும் வெளியிட்டு ரசிகர்களை ஈர்த்துள்ளது. அப்படி தற்போது தமிழில், கவுதம் மேனன், வெற்றி மாறன், விக்னேஷ் சிவன், சுதா கொங்கரா உள்ளிட்ட நான்கு இயக்குநர்களை வைத்து ஆந்தாலஜி படம் எடுக்கத் திட்டமிட்டு வருகிறது.
இது குறித்த அதிகாரபூர்வ அறிவிப்பு இன்னும் ஒரு சில மாதங்களில் வெளியாகும் என்று தெரிகிறது. குறும்படங்களின் தொகுப்பே ஆந்தாலஜி திரைப்படம். இதை ஒரே இயக்குநரோ அல்லது ஒன்றுக்கும் மேற்பட்ட இயக்குநர்களோ இயக்குவார்கள்.
ஏற்கெனவே இந்தியில் கரண் ஜோஹர், ஸோயா அக்தர், அனுராக் காஷ்யப் உள்ளிட்டவர்களை வைத்து நெட் ஃப்ளிக்ஸ் படம் தயாரித்துள்ளது. மேலும் மலையாளம், தெலுங்கு மொழிகளில் திரைப்படம் எடுக்கப் பேச்சுவார்த்தை நடந்து வருகிறது. நெட் ஃபிளிக்ஸுக்குப் போட்டியாக ஹாட் ஸ்டார், ஜீ 5, அமேசான் ப்ரைம் என மற்ற ஸ்ட்ரீமிங் தளங்களும் தயாரிப்பில் இறங்கியுள்ளது நினைவுகூரத்தக்கது.