சுசீந்திரன் இயக்கத்தில் பெரும் வரவேற்பு பெற்ற 'வெண்ணிலா கபடி குழு' படத்தின் இரண்டாம் பாகம் விரைவில் தயாராக இருக்கிறது.
'ஜீவா' படத்தைத் தொடர்ந்து விஷால் நடித்து வரும் படத்தை இயக்கி வருகிறார் சுசீந்திரன். காஜல் அகர்வால் நாயகியாக நடித்து வரும் இப்படத்தை வேந்தர் மூவிஸ் நிறுவனம் தயாரித்து வருகிறது.
இந்நிலையில், தனது முதல் படமான 'வெண்ணிலா கபடி குழு' படத்தின் இரண்டாம் பாகத்துக்கான கதை, திரைக்கதை எழுதி முடித்திருக்கிறார் சுசீந்திரன். 'வெண்ணிலா கபடி குழு' திரைப்படம் மக்களிடமும், விமர்சகர்களிடமும் பெரும் வரவேற்பைப் பெற்றது குறிப்பிடத்தக்கது.
தற்போது விஷால் படத்தை இயக்கி வருவதால், 'வெண்ணிலா கபடி குழு' படத்தின் இரண்டாம் பாகத்தை அவருடைய இணை இயக்குநர் சேகர் இயக்கவிருக்கிறார். 'ஜீவா' படத்தின் இரண்டாம் நாயகனாக நடித்த லஷ்மண் நாயகனாக நடிக்கவிருக்கிறார்.
ஏப்ரல் மாத இறுதியில் இப்படத்தின் படப்பிடிப்பு துவங்க இருக்கிறது. இதர நடிகர், நடிகைகள் தேர்வு தற்போது மும்முரமாக நடைபெற்று வருகிறது.