சித்திக் இயக்கத்தில் அரவிந்த்சாமி நடித்து வரும் 'பாஸ்கர் ஒரு ராஸ்கல்' படத்தை செப்டம்பரில் வெளியிட படக்குழு முடிவு செய்துள்ளது.
மலையாளத்தில் பெரும் வரவேற்பைப் பெற்ற 'பாஸ்கர் தி ராஸ்கல்' தமிழ் ரீமேக்கின் படப்பிடிப்பு கேரளாவில் தொடங்கப்பட்டது.
சித்திக் இயக்கத்தில் அரவிந்த்சாமி, அமலா பால், நைனிகா உள்ளிட்ட பலர் ஒப்பந்தம் செய்யப்பட்டு நடித்து வந்தார்கள். சென்னை, கொச்சின், கொல்கத்தா உள்ளிட்ட இடங்களில் இப்படத்தின் பெரும் பகுதி காட்சிகள் படமாக்கப்பட்டு முடிக்கப்பட்டன. 'பாஸ்கர் ஒரு ராஸ்கல்' படத்துக்கு இயக்குநர் ரமேஷ் கண்ணா வசனங்கள் எழுதியுள்ளார்.
விரைவில் இறுதிகட்ட படப்பிடிப்பைத் தொடங்க படக்குழு முடிவு செய்துள்ளது. மேலும் ஆகஸ்ட் மாத இறுதியில் படத்தின் விளம்பரப்படுத்தும் பணிகளையும் துவங்கவுள்ளது. செப்டம்பரில் படத்தை வெளியிட முடிவு செய்துள்ளார்கள்.
ஒற்றைப் பெற்றோருடன் வாழ்ந்து வரும் குழந்தைகள் நட்பாகி, எப்படி பெற்றோரைச் சேர்த்து வைக்கிறார்கள் என்பது தான் 'பாஸ்கர் ஒரு ராஸ்கல்' படத்தின் கதையாகும்.