உதயநிதி - கெளரவ் படத்தில் வில்லன் ரோலில் ஆர்.கே.சுரேஷ்

கெளரவ் இயக்கத்தில் உதயநிதி ஸ்டாலின் நடிக்கவிருக்கும் படத்தின் வில்லனாக ஆர்.கே.சுரேஷ் ஒப்பந்தம் செய்யப்பட்டு இருக்கிறார்.

'மனிதன்' படத்தைத் தொடர்ந்து எழில் இயக்கத்தில் உருவாகும் படத்தில் நடித்து வருகிறார் உதயநிதி. இப்படத்தின் படப்பிடிப்பு காரைக்கால் சுற்றியுள்ள பகுதிகளில் நடைபெற்றுவருகிறது. ரெஜினா, சூரி, சிருஷ்டி டாங்கே உள்ளிட்ட பலர் இப்படத்தில் நடித்து வருகிறார்கள். ரெட் ஜெயிண்ட் மூவிஸ் நிறுவனம் தயாரித்து வருகிறது.

இப்படத்தைத் தொடர்ந்து லைக்கா நிறுவனம் தயாரிப்பில் கெளரவ் இயக்கவிருக்கும் படத்துக்கு தேதிகள் ஒதுக்கியிருக்கிறார் உதயநிதி. இப்படத்துக்கான படப்பிடிப்பு இடங்களைத் தேர்வு செய்யும் பணி மும்முரமாக நடைபெற்று வருகிறது. அப்பணி முடிவடைந்தவுடன், உதயநிதியுடன் நடிக்கும் இதர நடிகர், நடிகைகள் தேர்வு நடைபெற இருக்கிறது.

இப்படத்தின் வில்லனாக ஆர்.கே.சுரேஷ் ஒப்பந்தம் செய்யப்பட்டுள்ளார். 'மருது', 'தாரை தப்பட்டை' ஆகிய படங்களில் வில்லனாக நடித்து பிரபலமடைந்தவர் ஆர்.கே.சுரேஷ். சமீபத்தில் சீனுராமசாமி இயக்கத்தில் வெளியாகியிருக்கும் 'தர்மதுரை' படத்தை தயாரித்தவரும் இவர் தான் என்பது நினைவுக் கூறத்தக்கது.