விஜய் தேவரகொண்டா நடித்த தெலுங்குப் படமான ‘துவாரகா’, தமிழில் ‘அர்ஜுன் ரெட்டி’ என்ற பெயரில் ரிலீஸாகிறது.
‘அர்ஜுன் ரெட்டி’ தெலுங்குப் படத்தின் மூலம் மொழி கடந்து ஏராளமான ரசிகர்களைப் பெற்றுள்ளார் விஜய் தேவரகொண்டா. அடுத்தடுத்து அவர் நடிப்பில் வெளியான ‘கீதா கோவிந்தம்’, ‘டாக்ஸிவாலா’ படங்களும் ரசிகர்களிடையே நல்ல வரவேற்பைப் பெற்றன.
எனவே, ‘நோட்டா’ படத்தின் மூலம் தமிழில் அறிமுகமானார் விஜய் தேவரகொண்டா. ஆனந்த் சங்கர் இயக்கிய இந்தப் படம், அரசியலை மையப்படுத்தி எடுக்கப்பட்டது. ஆனால், இந்தப் படம் எதிர்பார்த்த அளவுக்குப் போகவில்லை. ஆனாலும், விஜய் தேவரகொண்டாவின் க்ரேஸ் இன்னும் குறையவில்லை.
இந்நிலையில், விஜய் தேவரகொண்டா நடிப்பில் 2017-ம் ஆண்டு வெளியான ‘துவாரகா’ தெலுங்குப் படத்தை, தமிழில் டப் செய்து வெளியிடுகின்றனர். ஸ்ரீனிவாஸ் ரவிந்திரா இயக்கிய இந்தப் படத்தில், ஹீரோயினாக பூஜா ஜவேரி நடித்துள்ளார். முக்கியக் கதாபாத்திரத்தில் பிரகாஷ் ராஜ் நடித்துள்ளார்.
தமிழில் இந்தப் படத்துக்கு ‘அர்ஜுன் ரெட்டி’ என விஜய் தேவரகொண்டாவின் புகழ்பெற்ற படத் தலைப்பை வைத்துள்ளனர். பாடல் பதிவுடன் கடந்த பிப்ரவரி 1-ம் தேதி டப்பிங் பணிகள் தொடங்கின. இந்நிலையில், அனைத்துப் பணிகளும் முடிந்து மார்ச் 15-ம் தேதி ரிலீஸாகும் என அறிவிக்கப்பட்டுள்ளது.