லாரன்ஸ் இயக்கி நடித்து வரும் 'காஞ்சனா 3' படத்தின் மோஷன் போஸ்டர், 'பேட்ட' படத்துடன் வெளியாகும் என படக்குழு அறிவித்துள்ளது.
ராகவா லாரன்ஸ் இயக்கி, நாயகனாக நடித்துவரும் படம் ‘காஞ்சனா 3’ (முனி 4). ராகவேந்திரா புரொடக்ஷன்ஸ் சார்பில் லாரன்ஸே தயாரித்துவரும் இப்படத்தை, சன் பிக்சர்ஸ் நிறுவனம் வெளியிடுகிறது. இப்படத்தில் வேதிகா மற்றும் ஓவியா நடித்து வருகிறார்கள்.
நீண்ட நாட்களாக தயாரிப்பில் இருந்து வரும், இப்படத்தின் இறுதிகட்டப் படப்பிடிப்பு விரைவில் துவங்கவுள்ளது. மேலும், படத்தின் கிராபிக்ஸ் உள்ளிட்ட இறுதிகட்டப் பணிகளும் தீவிரமாக நடைபெற்று வருகிறது.
இப்படத்தின் உரிமையை சன் பிக்சர்ஸ் வாங்கியுள்ளதால், இதன் மோஷன் போஸ்டருடன் கூடிய ஃபர்ஸ்ட் லுக்கை 'பேட்ட' படத்துடன் வெளியிட முடிவு செய்துள்ளனர். மேலும், ஏப்ரல் 18-ம் தேதி இப்படம் வெளியாகும் என்று லாரன்ஸ் அறிவித்துள்ளார்.
கோடை விடுமுறையை கணக்கில் கொண்டே, இந்த தேதியை முடிவு செய்துள்ளது படக்குழு. 'காஞ்சனா' படத்தின் 2 பாங்களுமே மக்களிடையே நல்ல வரவேற்பு பெற்றுள்ளதால், இப்படத்துக்கு பெரும் எதிர்பார்ப்பு உருவாகியுள்ளது.
கோவை சரளா, தேவதர்ஷினி, ஸ்ரீமன் ஆகியோர் முக்கியக் கதாபாத்திரங்களில் நடித்துள்ளனர். இந்தப் படத்தின் இசைக்காக மதன் கார்க்கியின் ‘டூபாடூ’ நிறுவனத்துடன் கைகோர்த்துள்ளார் லாரன்ஸ்.