ரஜினி நடிக்கவுள்ள அடுத்த படத்தினை தனுஷ் இயக்கவுள்ளதாக தகவல்கள் வெளியாகியுள்ளன.
‘ஜெயிலர் 2’ படத்துக்குப் பிறகு ரஜினி நடிக்கவுள்ள அடுத்த படத்தினை சுந்தர்.சி இயக்க, கமல் தயாரிக்கவிருப்பதாக அறிவிக்கப்பட்டது. ஆனால் அறிவித்த சில தினங்களிலேயே, அப்படத்தின் இயக்குநர் பொறுப்பில் இருந்து சுந்தர்.சி விலகுவதாக அறிவித்தார். இது திரையுலகினர் மத்தியில் பெரும் அதிர்ச்சியை ஏற்படுத்தியது.
தற்போது ரஜினி நடிக்கவுள்ள 173-வது படத்தின் இயக்குநர் யார் என்பது கேள்விக்குறியாக உள்ளது. இதற்காக பல்வேறு இயக்குநர்கள் கதைகள் கூறி வருகிறார்கள். இதில் தனுஷும் கதையொன்றை கூறியிருப்பதாக தகவல்கள் வெளியாகின. இந்தக் கதை ரஜினிக்கு பிடித்திருப்பதாகவும் குறிப்பிட்டு இருந்தார்கள்.
இது தொடர்பாக விசாரித்த போது, ”இது வதந்தியே. இப்படியொரு பேச்சுவார்த்தை நடைபெறவில்லை” என்று தெரிவித்தார்கள். தற்போது விக்னேஷ் ராஜா இயக்கி வரும் படத்தில் கவனம் செலுத்தி வருகிறார் தனுஷ். அதற்குப் பிறகு மாரி செல்வராஜ், ஹெச்.வினோத் ஆகியோர் இயக்கத்தில் நடிக்க முடிவு செய்திருக்கிறார். இதனால் அடுத்து அவரது இயக்கத்தில் படம் உருவாக தாமதமாகும் என்கிறார்கள்.
