‘டூரிஸ்ட் ஃபேமிலி' இயக்குநர் அபிஷன் ஜீவிந்த் நாயகனாக நடிக்கும் படத்தை எம்ஆர்பி என் டர்டெயின்மென்ட் நிறுவனம் தயாரிக்கிறது. ஸயான் பிலிம்ஸ் சார்பில் சவுந்தர்யா ரஜினிகாந்த் இணை தயாரிப்பு செய்கிறார். இதில் அபிஷன் ஜீவிந்த் ஜோடியாக மலையாள நடிகை அனஸ்வரா ராஜன் நடிக்கிறார். ஷான் ரோல்டன் இசையமைக்கிறார்.
ஷ்ரேயாஸ் கிருஷ்ணா ஒளிப்பதிவு செய்கிறார். இதன் பூஜை சென்னையில் நடைபெற்றது. சசிகுமார், சிம்ரன், ஆர்ஜே பாலாஜி, நடிகர் மணிகண்டன், இயக்குநர் ரஞ்சித் ஜெயக்கொடி, பிரபு ராம் வியாஸ், டிடி, ஆகியோர் கலந்துகொண்டு படக்குழுவினரை வாழ்த்தினர்.
முழுக்க முழுக்க நவீன கால இளைஞர்களைக் கவரும் வகையில் காதல் கதையாக உருவாகும் இந்தப்படத்தை, ’லவ்வர்’, ‘டூரிஸ்ட் ஃபேமிலி’ படங்களில் இணை இயக்குநராக பணியாற்றிய, மதன் கதை, திரைக்கதை எழுதி இயக்குகிறார். படத்தின் மற்ற நடிகர்கள் மற்றும் தொழில் நுட்ப கலைஞர்கள் பற்றிய விவரங்கள் விரைவில் அதிகாரப்பூர்வமாக வெளியிடப்பட இருக்கிறது.