இறுதிகட்ட படப்பிடிப்பை எட்டிய ‘7ஜி ரெயின்போ காலனி 2’

செல்வராகவன் இயக்கி வரும் ‘7ஜி ரெயின்போ காலனி 2’ படத்தின் படப்பிடிப்பு இறுதிகட்டத்தை எட்டியிருக்கிறது.

2004-ம் ஆண்டு செல்வராகவன் இயக்கத்தில் ரவி கிருஷ்ணா, சோனியா அகர்வால் உள்ளிட்ட பலர் நடிப்பில் வெளியான படம் ‘7ஜி ரெயின்போ காலனி’. ஏ.எம்.ரத்னம் தயாரித்து வெளியிட்ட இப்படத்தின் பாடல்கள் மாபெரும் வரவேற்பைப் பெற்றது. படமும் விமர்சன ரீதியாகவும், வசூல் ரீதியாகவும் வெற்றியடைந்தது.

சில மாதங்களுக்கு முன்பாக ‘7ஜி ரெயின்போ காலனி 2’ படத்தை தொடங்கினார் செல்வராகவன். ஆனால், அப்படத்தின் படப்பிடிப்பு தொடர்ச்சியாக நடைபெறவில்லை. தற்போது புத்தாண்டை முன்னிட்டு போஸ்டர் ஒன்றை வெளியிட்டுள்ளது படக்குழு. அதன்படி படப்பிடிப்பு இறுதிகட்டத்தை எட்டியிருப்பதாக தெரிவித்துள்ளனர்.

இதில் ரவிகிருஷ்ணா, அன்ஸ்வரா ராஜன், ஜெயராம், சுமன், சுதா உள்ளிட்டோர் நடித்துள்ளனர். ஒளிப்பதிவாளராக ராம்ஜி, இசையமைப்பாளராக யுவன் ஆகியோர் பணிபுரிந்துள்ளனர். முதல் பாகத்தை தயாரித்த ஏ.எம்.ரத்னமே இப்படத்தையும் தயாரித்து வருகிறார்.