சென்னை: சிவகார்த்திகேயன் நடித்துள்ள ‘அமரன்’ திரைப்படம் உலகம் முழுவதும் ரூ.200 கோடி வசூலித்துள்ளதாக தகவல் வெளியாகியுள்ளது. இது, சிவகார்த்திகேயனின் கரியரில் குறிப்பிடத்தக்க சாதனையாக பார்க்கப்படுகிறது.
ராஜ்குமார் பெரியசாமி இயக்கத்தில் சிவகார்த்திகேயன் நடிப்பில் தீபாவளி பண்டிகையை முன்னிட்டு கடந்த அக்டோபர் 31-ம் தேதி திரையரங்குகளில் வெளியான படம் ‘அமரன்’. இந்தப் படத்தில் சாய் பல்லவி, முக்கிய கதாபாத்திரத்தில் நடித்துள்ளார். ஜி.வி.பிரகாஷ்குமார் இசையமைத்துள்ளார். கமல்ஹாசனின் ராஜ்கமல் பிலிம்ஸ் இன்டர்நேஷனல் நிறுவனம் இந்தப் படத்தை தயாரித்தது. மேஜர் முகுந்த் வரதராஜனின் பயோபிக்காக இந்தப் படம் உருவாகியுள்ளது. படம் வெளியான முதல் நாளில் இருந்தே ரசிகர்களிடையே நல்ல வரவேற்பை பெற்றது.
முதல் நாள் ரூ.45 கோடிக்கும் அதிகமான வசூலை ஈட்டியதாக படக்குழு அறிவித்தது. அண்மையில் படக்குழு சார்பில் வெற்றி விழா நிகழ்வும் நடத்தப்பட்டது. இந்நிலையில், படம் வெளியாகி இன்றுடன் 10 நாட்கள் ஆன நிலையில், இப்படம் உலகம் முழுவதும் ரூ.200 கோடி வசூலை ஈட்டியுள்ளதாக தகவல் வெளியாகியுள்ளது. இந்தியாவில் மட்டும் ரூ.122 கோடியை வசூலித்துள்ளதாக கூறப்படுகிறது.
இந்தப் படத்தின் பட்ஜெட் ரூ.100 கோடி என தகவல் வெளியாகியுள்ளது. கடந்த வெள்ளிக்கிழமை கோலிவுட்டில் இருந்து எந்தப் படமும் ரிலீஸாகாதது இந்தப் படத்துக்கு மேலும் சாதகமாக அமைந்துள்ளது. அடுத்து நவம்பர் 14-ல் சூர்யாவின் ‘கங்குவா’ வெளியாக உள்ளதால் அதுவரை ‘அமரன்’ வசூல் கூடும் என திரை வர்த்தகர்கள் கணித்துள்ளனர்.