ஜூனியர் என்.டி.ஆர்
ஜூனியர் என்.டி.ஆர், ஜான்வி கபூர் நடிப்பில் தெலுங்கு, தமிழ் உள்பட5 மொழிகளில் வெளியான திரைப்படம், ‘தேவரா’. இதில் இடம்பெற்ற ‘சுட்டமல்லி’ என்ற பாடல் காட்சியில் இடம்பெற்ற ஜான்வி கபூரை, செயற்கை நுண்ணறிவு மூலம் தவறாக எடிட் செய்து இணையதளங்களில் பரப்பியதற்கு ஜூனியர் என்.டி.ஆர் கடும் கண்டனம் தெரிவித்துள்ளார்.
இதுகுறித்து அவர், “ஏ.ஐ தொழில்நுட்பத்தைத் தவறாகப் பயன்படுத்தி உருவாக்கப் பட்டுள்ள இந்த வீடியோ அருவருப்பானது, வக்கிரமானது மற்றும் வெட்கக்கேடானது. பெண்களைத் தாயாகவும் தெய்வமாகவும் போற்றும் தேசம் இது; தாயே தெய்வம் என்பது வெறும் வாசகம் மட்டுமல்ல, நம் கலாச்சாரத்தின் ஒரு பகுதி. அப்படிப்பட்ட சூழலில், ஒரு பெண்ணை மிகவும் இழிவான முறையில் அவமதிக்கச் சிலர் செயற்கை நுண்ணறிவைப் பயன்படுத்தும் அளவுக்குத் தரம் தாழ்ந்து போயுள்ளனர்.
இவ்வளவு மோசமான ஒன்றை உருவாக்க ஏ.ஐ-யை பயன்படுத்துவது வெட்கக்கேடானது. இதை உருவாக்கிய யாரையும் சும்மா விடமாட்டேன். அவர்கள் மீது அனைத்து சட்ட நடவடிக்கைகளையும் எடுப்பேன். தயவுசெய்து இதுபோன்ற உள்ளடக்கத்தைப் பார்க்கவோ, பகிரவோ வேண்டாம்.
இன்று இதுவேறொருவருக்கு நடக்கலாம்; நாளை இது உங்கள் தாய், சகோதரி, மனைவி அல்லது மகளுக்குக்கூட நடக்கலாம். இது ஒரு தீவிரமான பிரச்சினை. ஏ.ஐ-யின் தவறான பயன்பாட்டுக்கு எதிராகக் கடுமையான விதிமுறைகளைக் கொண்டு வருமாறும், உறுதியான நடவடிக்கைகளை எடுக்குமாறும் மாநில அரசுகளையும் இந்திய அரசையும் வலியுறுத்துகிறேன்” என்று கூறியுள்ளார்.
