

பிரசாந்த் வர்மா இயக்கத்தில், தேஜா சஜ்ஜா நாயகனாக நடித்து வரவேற்பைப் பெற்ற திரைப்படம் ‘ஹனுமேன்’. சூப்பர் ஹீரோ ஜானரில் உருவான இந்தப் படத்தை பிரைம்ஷோ என்டர்டெயின்மென்ட் சார்பில் கே.நிரஞ்சன் ரெட்டி – சைதன்யா ரெட்டி தயாரித்தனர். இப்போது இந்நிறுவனம் அடுத்த படத்தை அறிவித்துள்ளது.
முதல் பாகத்தில் நடித்த தேஜா சஜ்ஜா மாற்றப்பட்டு, பஞ்சா வைஷ்ணவ் தேஜ் முக்கிய கதாபாத்திரத்தில் நடிப்பதாக அறிவிக்கப்பட்டுள்ளது. இப்படத்துக்கு ‘ஹனு-மேன் 2: தி ரைஸ் ஆஃப் வானராஸ்’ என்று தலைப்பு வைத்துள்ளனர். பிரம்மாண்டமான கற்பனைப் பொழுதுபோக்குத் திரைப்படமாக உருவாகும் இது, புராணங்கள் மற்றும் அசாதாரணமான புதிய உலகத்துக்கான கதவுகளைத் திறக்கும் என தெரிவித்துள்ள படக்குழு, இதன் டைட்டில் போஸ்டரை வெளியிட்டுள்ளது.
இப்படத்தை விஐ.ஆனந்த் எழுதி இயக்குகிறார். இவர் தமிழில், ‘அப்புச்சி கிராமம்’ படத்தை இயக்கியுள்ளார். இதில் நடிக்கும் மற்ற நடிகர்கள் மற்றும் தொழில்நுட்பக் கலைஞர்கள் குறித்த விவரங்கள் விரைவில் வெளியிடப்பட இருக்கிறது. ‘ஹனு- மேன்’ படத்தை இயக்கிய பிரசாந்த் வர்மா தனது சினிமாடிக் யுனிவர்ஸின் கீழ், ரிஷப் ஷெட்டி நடிக்கும் ‘ஜெய் ஹனுமான்’ படத்தை இயக்கி வருவது குறிப்பிடத்தக்கது.