கடந்த ஆகஸ்ட் மாதம் மட்டும் இந்திய பாக்ஸ் ஆபீஸ், ரூ.1,768 கோடி வசூலை ஈட்டியுள்ளது.
ஒவ்வொரு மாதமும் வெளியாகும் திரைப்படங்களுக்குக் கிடைக்கும் வரவேற்பைப் பொறுத்து இந்திய சினிமாவின் பாக்ஸ் ஆபீஸ் வசூல் ஏறி, இறங்குவது வழக்கம். அதன்படி கடந்த ஆகஸ்ட் மாதம் மட்டும் இந்திய பாக்ஸ் ஆபீஸ், ரூ.1,768 கோடி வசூலை எட்டியுள்ளது. இந்த ஆண்டில் இதுவரை இல்லாத சிறந்த வசூலாக இது உருவெடுத்துள்ளது. அதோடு, இந்திய பாக்ஸ் ஆபீஸ் வரலாற்றில் 3-வது மிகச் சிறந்த மாதமாகவும் மாறியிருக்கிறது.
ஆகஸ்ட் மாத பாக்ஸ் ஆபீஸ் வசூலில் முதலிடம் பிடித்திருப்பது ‘ஹனுமன் அன்ஸ்’. ஆன்மிக குருவான நீம் கரோலி பாபாவின் வாழ்க்கை மற்றும் போதனைகளை அடிப்படையாகக் கொண்டு விஷால் சதுர்வேதி இயக்கத்தில் வெளியான ஆன்மிகத் திரைப்படம் இது. மிகக்குறைந்த பட்ஜெட்டில் உருவான இந்த இந்தி திரைப்படம் இப்போதுவரை வசூல் வேட்டை நடத்தி வருகிறது.
அடுத்து, யாஷின் டாக்ஸிக், ரவிதேஜாவின் இருமுடி, நிவின் பாலியின் பெத்லகேம் குடும்ப யூனிட், இந்தி திரைப்படமான ஆவாரபன் 2 ஆகிய திரைப்படங்கள் ஆகஸ்ட் மாதம் அதிக வசூல் பங்களிப்பைச் செய்துள்ளன. இந்நிலையில் அந்த மாதத்தின் மொத்த வசூலாக ரூ.1,768 கோடி கிடைத்துள்ளது. இது, இந்த ஆண்டின் மிகச்சிறந்த மாதமாகவும், இந்திய பாக்ஸ் ஆபீஸ் வரலாற்றில் டிச. 2024, டிச. 2023-க்கு அடுத்தபடியாக, 3-வது சிறந்த மாதமாகவும் திகழ்கிறது.
இந்த ஆண்டு, ஜனவரி முதல் ஆகஸ்ட் வரை வெளியான படங்களின் மொத்த வசூல் ரூ.9,868 கோடியை எட்டியுள்ளது. இது 2025-ம் ஆண்டின் இதே காலக்கட்டத்தை விட 18 சதவிகிதம் அதிகம்.
