‘பெடி’ படத்தில் ராம்சரண் உடன் ஒரு பாடலுக்கு நடனமாட உள்ளார் ஸ்ருதிஹாசன்.
புஞ்சி பாபு சனா இயக்கத்தில் ராம்சரண் நடிப்பில் உருவாகி வரும் படம் ‘பெடி’. இதன் படப்பிடிப்பு இன்னும் முடிவடையாத காரணத்தால், இப்படத்தின் வெளியீடு ஜூன் மாதத்துக்கு தள்ளி வைக்கப்பட்டுள்ளது. இதனிடையே இப்படத்தில் ஒரு பாடல் ஒன்றின் படப்பிடிப்பு இன்று முதல் தொடங்கப்பட்டுள்ளது.
இப்பாடலில் ராம்சரண் உடன் நடனமாட உள்ளார் ஸ்ருதிஹாசன். இதற்காக பிரம்மாண்ட அரங்குகள் அமைக்கப்பட்டு படப்பிடிப்பு தொடங்கப்பட்டுள்ளது. இப்பாடலுடன் ஒட்டுமொத்த படப்பிடிப்பும் முடிவடையும். இதனைத் தொடர்ந்து இறுதிகட்டப் பணிகளை முடித்து, ஜூனில் வெளியிட படக்குழு முடிவு செய்திருக்கிறது.
இப்படத்தில் ஜான்வி கபூர், சிவராஜ் குமார், ஜெகபதி பாபு, சாய் குமார், போமன் இரானி உள்ளிட்ட பலர் ராம் சரண் உடன் நடித்துள்ளனர். இதற்கு ஒளிப்பதிவாளராக ரத்னவேலு, இசையமைப்பாளராக ஏ.ஆர்.ரஹ்மான் ஆகியோர் பணிபுரிந்து வருகிறார்கள்.
