ராஜமெளலி இயக்கத்தில் உருவாகிவரும் ’பாகுபலி 2’ ட்ரெய்லர் வெளியீடு எப்போது என்பதற்கு படக்குழு விளக்கம் அளித்துள்ளது.
பிரபாஸ், ராணா, அனுஷ்கா, தமன்னா, சத்யராஜ், நாசர், ரம்யா கிருஷ்ணன் உள்ளிட்ட பலர் நடிப்பில் தமிழ், தெலுங்கு, இந்தி உள்ளிட்ட மொழிகளில் வெளியான படம் 'பாகுபலி'. ராஜமெளலி இயக்கிய இப்படத்தை ஷோபு மற்றும் பிரசாத் இருவரும் இணைந்து தயாரித்திருந்தார்கள். தமிழில் ஞானவேல்ராஜாவும் இந்தியில் கரண் ஜோஹரும் இப்படத்தை வெளியிட்டார்கள்.
உலகளவில் சுமார் 600 கோடி ரூபாய் வசூல் செய்து இந்தியாவில் தயாரான படங்களில் அதிக வசூல் செய்த படம் என்ற சாதனையை படைத்தது. மேலும், 'பாகுபலி 2' படத்துக்கு பெரும் எதிர்பார்ப்புகள் நிலவி வருகிறது.
அனுஷ்கா பாத்திரத்தின் பின்னணி என்ன, கட்டப்பா ஏன் பாகுபலியைக் கொன்றார் உள்ளிட்ட பல கேள்விகளுக்கு 'பாகுபலி தி கன்க்ளூஷன்'-ல் விடை தெரியவிருக்கிறது. மொத்த படப்பிடிப்பும் முடிவுற்று, இறுதிகட்ட பணிகள் துரிதமாக நடைபெற்று வருகிறது.
ஏப்ரல் 28-ல் வெளியாகவுள்ள இப்படத்தின் ட்ரெய்லர் வெளியீடு எப்போது என்று படக்குழுவிடம் கேட்ட போது, "அதிக பார்வைகளை கடந்த ட்ரெய்லர் என்ற பெருமையை பிடிக்க திட்டமிட்டுள்ளோம். ஒரே நாளில் தமிழ், தெலுங்கு, இந்தி மற்றும் மலையாளம் ஆகிய மொழிகளில் ட்ரெய்லர் வெளியாகும்.
ட்ரெய்லர் எடிட்டர் பணிகள் முடிவடைந்து, தற்போது அதன் டி.ஐ. பணிகள் மேற்கொள்ளப்பட்டு வருகிறது. 3 விதமான ட்ரெய்லர் முடித்து வைத்துள்ளோம். விரைவில் எந்த ட்ரெய்லர் என்பதை இயக்குநர் ராஜமெளலி முடிவு செய்வார்.
மார்ச் 3-வது வாரத்தில் வெளியிட திட்டமிட்டுள்ளோம். ஒரே நாளில் ஹைதராபாத் மற்றும் மும்பை ஆகிய ஊர்களில் 2 பிரம்மாண்ட நிகழ்வுகளில் ட்ரெய்லர் வெளியிடப்படும். இரண்டு நிகழ்வுகள் என்பதால் அதில் பங்கேற்க இருப்பவர்களின் தேதிகள் இறுதிசெய்யப்பட்ட உடன், ட்ரெய்லர் வெளியீட்டு தேதி முடிவாகும்" என்று தெரிவித்தார்கள்.
'பாகுபலி' பணிகள் முடிவடைந்ததைத் தொடர்ந்து, தனது அடுத்த படத்தில் கவனம் செலுத்த தொடங்கியுள்ளார் பிரபாஸ்.