ஹைதராபாத்: அல்லு அர்ஜுன் நடிப்பில் வெளியாகி திரையரங்குகளில் திரையிடப்பட்டுக் கொண்டிருக்கும் ‘புஷ்பா 2’ திரைப்படம் உலக அளவில் 5 நாட்களில் ரூ.922 கோடியை வசூலித்துள்ளதாக அறிவிக்கப்பட்டுள்ளது. இந்தியில் மட்டும் 5 நாட்களில் ரூ.339 கோடியை வசூலித்துள்ளது. இந்தியில் அதிவேகமாக ரூ.300 கோடி வசூலை எட்டிய படம் என்ற சாதனையை படைத்துள்ளது. தமிழகத்தில் படம் முதல் நாளில் ரூ.11 கோடியை வசூலித்தது. 5 நாட்களில் ரூ.35 கோடியை நெருங்கியுள்ளதாக கூறப்படுகிறது.
ரூ.300 கோடிக்கும் அதிகமான பட்ஜெட்டில் உருவானதாக கூறப்படும் இப்படம் வெளியான 5 நாட்களில் ரூ.922 கோடியை வசூலித்துள்ள நிலையில், விரைவில் ரூ.1000 கோடியை எட்டலாம் என திரை வர்த்தகர்கள் கணித்துள்ளனர். மேலும் இப்படம் ராஜமவுலியின் ‘ஆர்ஆர்ஆர்’ படத்தின் ரூ.1300 கோடி சாதனையை முறியடிக்கும் எனவும் கூறப்படுகிறது.
சுகுமார் இயக்கத்தில் அல்லு அர்ஜுன் நடிப்பில் கடந்த 2021-ம் ஆண்டு திரையரங்குகளில் வெளியான படம் ‘புஷ்பா’. இந்தப் படத்தின் இரண்டாம் பாகம் கடந்த டிசம்பர் 5-ம் தேதி வெளியானது. ஃபஹத் ஃபாசில், ராஷ்மிகா மந்தனா உள்ளிட்ட பலர் நடித்துள்ள இந்தப் படத்துக்கு தேவிஸ்ரீ பிரசாத் இசையமைத்துள்ளார். சாம்.சி.எஸ். பின்னணி இசை அமைத்துள்ளார். மைத்ரி மூவி மேக்கர்ஸ் நிறுவனம் இப்படத்தை தயாரித்துள்ளது குறிப்பிடத்தக்கது.