கைண்ட் ஹார்ட்ஸ் அண்ட் கோரோனெட்ஸ் (1949): பிரபு பட்டத்துக்காக கொலைகள்! | ஹாலிவுட் மேட்னி 55

கைண்ட் ஹார்ட்ஸ் அண்ட் கோரோனெட்ஸ் (1949): பிரபு பட்டத்துக்காக கொலைகள்! | ஹாலிவுட் மேட்னி 55
Updated on: 
3 min read

வாரிசுரிமை மறுக்​கப்​பட்ட தாயின் சாபத்தை நிறைவேற்ற, உயர்​குடிக் குடும்​பத்து வாரிசுகளைக் கொன்று, பிரபு பட்​டத்தை அடையும் இளைஞன், இறுதி​யில் தான் எழுதிய கொலைக் குறிப்​பு​களால் மாட்​டிக்​கொள்​வதே ‘கைண்ட் ஹார்ட்ஸ் அண்ட் கோரோனெட்ஸ் (KIND HEARTS AND CORONETS -1949)’ படத்​தின் ஒரு​வரிக் கதை.

சிறைச்​சாலை​யின் வெளிப்​புறக் கத​வில் லூயிஸ் மஸ்ஸினி என்​பவர், நாளை காலை 8 மணிக்கு தூக்​கி​லிடப்​படுவ​தாக நோட்​டீஸ் ஒட்​டப்​பட்​டிருக்​கிறது. சிறைக்​குள், லூயிஸ் மஸ்ஸினி தனது வாழ்க்​கைக் குறிப்​பு​களை எழுத ஆரம்​பிக்​கிறான். டி’அஸ்​காய்ன் என்ற பிரபுக்​கள் குடும்​பத்​தைச் சேர்ந்த அவனது அம்மா, இத்​தாலிய பாடக​னைக் காதலித்​ததால் குடும்​பத்​தா​ரால் ஒதுக்​கப்​படு​கிறாள்.

2-ம் சார்​லஸ் மன்​னர் வழங்​கிய சிறப்பு உரிமையின்​படி, அவளது மக​னுக்கு வாரிசுரிமை இருந்​தும் குடும்​பத்​தினர் மதிக்​க​வில்லை. குடும்​பக் கல்​லறை​யில் அடக்​கம் செய்​யப்​பட வேண்​டும் என்ற அவளது கடைசி ஆசையும் நிறைவேறாததால் வாரிசுகளைக் கொன்று பிரபுப் பட்​டத்தை அடைய சப​தம் எடுக்​கிறான் லூயிஸ்.

சிறு​வயதுத் தோழி சிபெல்லா, லூயிஸ் ஏழை என்​ப​தால் அவனை நிராகரித்​து​விட்டு பணக்​காரனான லியோனலைத் திரு​மணம் செய்​கிறாள். தான் விரும்​பிய அனைத்​துக்​கும் அந்​தப் பிரபுக்​கள் குடும்​பமே தடை​யாக இருப்​ப​தாக நினைக்​கும் லூயிஸ், தனது தாயின் ஓவியத்​தின் பின்​புறத்​தில் ‘ஃபேமிலி ட்ரீ’ உரு​வாக்கி, வாரிசுகளுக்​குக் குறி வைக்​கிறான்.

முதலில் வங்​கி​யாளர் மக​னின் படகை அவிழ்த்​து​விட்டு, அவனது மரணத்​துக்​குக் காரண​மாகிறான். புகைப்​படக் கலைஞரான ஹென்​றியை தீ விபத்து ஏற்​படுத்​திக் கொல்​கிறான். அவன், மனைவி எடித்​தைக் காதலித்து குடும்​பத்​துக்​குள் நுழைகிறான். மதகுரு​வுக்கு விஷம் கலந்த மது​வைக் கொடுத்​தும் லேடி அகதாவை பலூனில் பறக்​கும்​போது அம்​பெய்​தி​யும் கடற்​படை அட்​மிரலை கப்​பல் விபத்​திலும் ராணுவ ஜெனரலுக்கு வெடிகுண்டு அனுப்​பியும் கொல்​கிறான்.

இதற்​கிடையே, கஷ்​டத்​தில் இருக்​கும் லியோனல் உதவி கேட்க, லூயிஸ் மறுத்து அவனுடன் சண்​டை​யிடு​கிறான். திரு​மண வாழ்​வில் ஏமாற்​றமடைந்த சிபெல்லா மீண்​டும் லூயிஸை அணுக, அவனோ எடித்​தைத் திரு​மணம் செய்​யப்​போவ​தாகக் கூறுகிறான்.

இறுதி​யாக பொறி​யில் சிக்​கிய 8-வது வாரிசை துப்​பாக்​கி​யால் சுட்​டுக் கொல்​லும் லூயிஸ், டியூக் பட்​டத்​தைப் பெற்று பத​வி​யேற்​கிறான். பத​வி​யேற்பு விழாவுக்கு ஸ்காட்​லாந்து யார்டு போலீ​ஸாரும் வந்​திருப்​ப​தைப் பார்த்து அதிர்ச்​சி​யடைகிறான். தான் செய்த கொலைகளுக்கு துப்பு எதையும் விட்​டுவைக்​க​வில்லை என்று நிம்​மதி​யாக இருக்​கும் போது, லியோனலின் மரணத்​துக்கு அவன் தான் காரணம் என்று போலீ​ஸாரால் கைது செய்​யப்​படு​கிறான். செய்​யாத கொலைக்​காக லூயிஸுக்​குத் தூக்​குத் தண்​டனை விதிக்​கப்​படு​கிறது.

சிறைக்கு வரும் சிபெல்லா, லியோனலின் தற்​கொலைக் கடிதம் தன்​னிடம் இருப்​ப​தாகக் கூறி, எடித்​தைக் கைவிட்டு தன்​னைத் திரு​மணம் செய்​தால் தப்​பிக்​கலாம் என்று பேரம் பேசுகிறாள். லூயிஸ் சம்​மதிக்​கிறான். தூக்​குத் தண்​டனை நிறைவேற்​றப்​படுவதற்கு முந்​தைய நாள் வரை விடுதலை அறி​விப்பு வராததால், விரக்​தி​யில், தான் செய்த கொலைகளை விரிவாக எழுதுகிறான். தூக்​கி​லிடப்​படுவதற்​குச் சில நிமிடங்​களுக்கு முன் கடிதம் கிடைத்து விடுதலை​யாகிறான்.

வெளியே சிபெல்​லா​வும் எடித்​தும் காத்​திருக்​கின்​றனர். அப்​போது​தான் கொலைக் குறிப்​பு​களைச் சிறை​யிலேயே விட்​டுவந்​தது லூயி​ஸின் நினைவுக்கு வரு​கிறது. அந்​தக் குறிப்​பு​களை நோக்​கிக் கேமரா நகர, லூயிஸ் மாட்​டிக் கொள்​வானோ என்ற சஸ்​பென்​ஸுடன் முடி​கிறது இந்​தப் பிரிட்​டிஷ் திரைப்​படம். ஆனால் அமெரிக்​கப் பதிப்​பில், ‘ஹேய்ஸ் கோட்’ தணிக்கை விதி​யின் ‘குற்​றம் தண்​டனை​யின்​றித் தப்​பக்​கூடாது’ என்ற கொள்​கை​யின்​படி, சிறைக் காவலர்​கள் கொலைக் குறிப்​பு​களைக் கண்​டு​பி​டிக்​கும் கூடுதல் காட்​சி​யுடன் படம் முடி​கிறது.

ராய் ஹார்​னிமேன் எழுதிய ‘இஸ்​ரேல் ரேங்க்’ நாவலைத் தழுவி, ஜான் டைட்​டனுடன் இணைந்து திரைக்​கதை அமைத்து இயக்​கி​யிருக்​கிறார் ராபர்ட் ஹேமர். 8 வாரிசுகளின் மரணங்​களுக்கு வழிவகுக்​கும் ஒரு​வனின் கதையை, பழிவாங்​கும் கதைகளுக்கே உரிய ரத்​தக் களரி​யின்றி, உயர்​குடிக்கே உரிய பிரிட்​டிஷ் நையாண்​டியுடன் ஒரு கொலைக் கதையைக் கலைநயமிக்க படைப்​பாக உரு​மாற்​றி​யிருக்​கிறார்.

ஒளிப்​ப​திவாளர் – டக்​ளஸ் ஸ்லோகோம்பே: 20-ம் நூற்​றாண்​டின் தொடக்​ககால எட்​வர்​டியன் இங்​கிலாந்​தின் சூழலை​யும் அதன் பிரம்​மாண்​டத்​தையும் நம் கண்​களுக்கு விருந்​தாக்​கு​கிறார். நவீன தொழில்​நுட்ப வசதி​கள் இல்​லாத காலத்​தில், அலெக் கின்​னஸ் ஏற்ற ஆறு கதாபாத்​திரங்​கள் ஒரே ஃபிரேமில் தோன்​றும் புகழ்​பெற்ற காட்​சி​யைப் பட​மாக்​கிய விதம் அசாத்​தி​ய​மான தொழில்​நுட்ப உழைப்பு!

கேம​ராவை ஒரே இடத்​தில் நிலை​யாக நிறுத்தி, ஒளி புகாத மறைப்​பு​களைப் பயன்​படுத்தி, ஒவ்​வொரு கதாபாத்​திரத்​தையும் தனித்​தனியாகப் பட​மாக்கி, ஒரே ஃபிலி​மில் பலமுறை பதிவுசெய்து அக் காட்​சியை உரு​வாக்​கி​யுள்​ளனர். பின்​னாளில் ஸ்டீவன் ஸ்​பீல்​பெர்க்​கின் ‘இண்டியானா ஜோன்ஸ்’ திரைப்​பட வரிசையின் முதல் மூன்று படங்​களுக்​கும் ஒளிப்​ப​திவு செய்​தவர் இவர்; மூன்று முறை ஆஸ்​கர் பரிந்​துரை பெற்​றவர்.

படத்​தொகுப்​பாளர் – பீட்​டர் டேனர்: அடுத்​தடுத்து கொலைகள் நடந்​தா​லும், உறுத்​தலான வெட்​டு​கள் இல்​லாத​படி காட்​சிகள் மென்​மையாக நகர்​கின்​றன. படத்​தைக் கவிதை போல் கோர்த்​ததில் இவரது உழைப்​பும் அளப்​பரியது. கூடவே, படத்​தோடு பயணிக்​கும் எர்​னஸ்ட் இர்​விங்​கின் ‘தி பில்​ஹார்​மோனியா ஆர்​கெஸ்ட்ரா’இசை, கதையோட்​டத்​துக்கு சிறப்​பைச் சேர்க்​கிறது.

டென்​னிஸ் பிரைஸ் – லூயிஸ் மஸ்ஸினி: சாந்​த​மான முகத்​துடன் அத்​தனை கொலைகளைச் செய்​தா​லும், ‘நாமும் சேர்ந்து அவருக்கு உதவலாமே’ என எண்ண வைக்​கும் அளவுக்கு அவரது பாந்​த​மான நடிப்பு நம்​மைப் பரவசப்​பட வைக்​கிறது. அலெக் கின்​னஸ்: டி’அஸ்​காய்ன் குடும்​பத்​தின் 8 உறுப்​பினர்​களாக, ஒவ்​வொரு கதாபாத்​திரத்​துக்​கும் தனித்​து​வ​மான உடல்​மொழியையும் குணாதிசயத்​தையும் அளித்து அற்​புத​மாக நடித்​துள்​ளார்.

ஜோன் கிரீன்​வுட் – சிபெல்லா: பணத்​துக்​காக நிலைப்​பாட்டை மாற்​றிக்​கொள்​ளும் வஞ்​சகப் பெண்​ணாகச் சிறப்​பாக நடித்​துள்​ளார்.

வலெரி ஹாப்​சன் – எடித்: இயல்​பான, மென்​மையான நடிப்​பால் வெகு​வாகக் கவர்​கிறார். ஆட்ரே ஃபைல்ட்ஸ் – மாமா: காதல் திரு​மணத்​தால் குடும்​பத்​தால் ஒதுக்​கப்​பட்டு, மக​னுக்​குள் பழிவாங்​கும் உணர்வை விதைத்​துச் செல்​லும் பரிதாபமான அம்​மாவாக கவர்​கிறார்.

நாயக​னின் ‘வாய்ஸ் ஓவரி’ல் கதை விவரிக்​கப்​படுவது சுவாரஸ்​யத்தை ஏற்​படுத்து​கிறது. கொடூர​மான கொலை நடந்து கொண்​டிருக்​கும்​போது பின்​னணி​யில் நாயக​னின் குரல் மிக அமைதி​யாகவும் கண்​ணி​ய​மாகவும் ஒலிக்​கும். காட்​சி​யின் குரூரத்​துக்​கும் குரலின் நளினத்​துக்​கும் இடை​யி​லான இந்த முரண்​பாடுதான் படத்​தின் டார்க் காமெடியை உச்​சத்​துக்கு கொண்டு செல்​கிறது.

வித்​தி​யாச​மான திரைக்​கதை உத்​தி​களைக் கற்​றுக்​கொள்ள விரும்​பும் திரை ஆர்​வலர்​கள், இந்​தப் படத்​துக்​காக ஒரு மாலைப்​பொழுதை ஒதுக்​கலாம்!

(செவ்​வாய்​தோறும் படம் பார்ப்போம்)

கைண்ட் ஹார்ட்ஸ் அண்ட் கோரோனெட்ஸ் (1949): பிரபு பட்டத்துக்காக கொலைகள்! | ஹாலிவுட் மேட்னி 55
தி ரோரிங் ட்வென்டீஸ் (1939): கேங்ஸ்டர் யுகத்தின் வீழ்ச்சி | ஹாலிவுட் மேட்னி 54

X