வெறிபிடித்த கும்பலால் எரிக்கப்பட்டு தப்பித்த ஒருவன், இறந்ததாக நாடகமாடி அக்கொலைகார கும்பலை கூண்டிலேற்ற முயல்வது ‘ஃப்யூரி’ (1936) படத்தின் ஒரு வரிக்கதை. சிகாகோவில் தன்னை பிரிந்து செல்லும் காதலி கேத்தரினுக்கு ‘மொமென்டம்(?)’ வாங்கிக் கொடுக்கிறார் ஜோசப் வில்சன். அது மொமென்டம் இல்லை மொமெண்டோ என்று திருத்துகிற கேத்தரின் வாஷிங்டனில் டீச்சராக வேலை பார்க்கிறாள்.
வில்சன் பொருளாதார ரீதியாக செட்டில் ஆனபிறகு திருமணம் செய்ய முடிவெடுக்கிறார்கள். வில்சனுக்கு தன் குடும்ப மோதிரத்தோடு முத்தத்தையும் பரிசாக கொடுத்துவிட்டு கிளம்புகிறாள் கேத்தரின். மாதங்கள் கடக்க, பிசினஸில் முன்னேறி அவளைச் சந்திக்க வருவதாகக் கடிதம் அனுப்பி விட்டு சொந்தக் காரில் கிளம்புகிறார் வில்சன்.
எல்லையை கடக்கும்போது அவர் மீது சந்தேகப்பட்டு, ஷெரீப் முன் நிறுத்துகிறார்கள். ஒரு குழந்தை கடத்தல் வழக்கில் 10 ஆயிரம் டாலர் பிணையத் தொகை கேட்ட கும்பலில் ஒருவன், இவரைப்போல உப்பு வேர்க்கடலை தின்பவனாம்! ‘இல்லினாய்ஸ்’ நம்பர் பிளேட், உயரம், எடை, பிணையத் தொகையாகக் கொடுக்கப்பட்ட டாலர்களின் நம்பர் வரிசையில் இவரது பர்ஸிலுள்ள 5 டாலர் என அனைத்தும் ஒத்துப் போவதாகச் சொல்லி அவரை சிறையில் அடைக்கிறார்கள்.
கடத்தல்காரன்(?) பிடிபட்ட செய்தி ஊர்முழுவதும் பரவுகிறது. சட்டத்தின் மீது நம்பிக்கை இழந்த ஒரு கோபக் கூட்டம், சிறைச் சாலையை முற்றுகையிட்டு, ஸ்டேஷனை தீ வைத்து சாம்பலாக்கி விடுகிறது. காதலனைக் காணவில்லை என்று பரிதவிக்கும் கேத்தரினுக்கு வில்சன் சிறையில் இருப்பது தெரிந்து வருகிறாள். அவள் கண்முன் வில்சனை நெருப்பு சூழ்கிறது.
கேத்தரின் மயங்கி விழுகிறாள். போதாக்குறைக்கு அக்கும்பல் ஒரு ‘டைனமைட்’டையும் வீசிவிட்டுப் போகிறது. அது ஏற்படுத்திவிட்ட வழியால் வில்சன் தப்பிக்கிறான். அவனது விசுவாசமான நாய் ரெயின்போ இறந்து விடுகிறது. அதனால் கோபம் கொண்ட வில்சன், தன்னைக் கொளுத்திய(?)வர்களைப் பழிவாங்கத் துடிக்கிறான்.
தன் சகோதரர்கள் டாம் மற்றும் சார்லியை சந்தித்துப் பேசுகிறான்.வழக்கு தொடுக்கப்பட்டு அரசு வழக்கறிஞர், இந்தச் சம்பவத்துக்கு காரணமான 22 பேர் கொண்ட கும்பலை நீதிமன்றத்தில் நிறுத்துகிறார். ஆனால் குற்றவாளிகளை அடையாளம் தெரியாது என ஷெரீப் முதல் பலரும் மறுத்து விடுகிறார்கள்.
வழக்கு தோல்வியடையும் நிலைக்குச் செல்ல, சிறையில் தீயிட்டுக் கொளுத்திய அந்த 22 பேரையும் தெளிவாகப் படம் பிடித்த ‘நியூஸ் ரீல்’ காட்சிகளை நீதிமன்றத்தில் ஒப்படைக்கிறார் வழக்கறிஞர். கும்பலைத் தண்டித்தே தீர வேண்டும் என்று ஆவேசப்படுகிறார் வில்சன். அவனது ஆவேசத்தின் முடிவு என்ன? கும்பல் தண்டிக்கப்பட்டதா? அவனையே நம்பி இருந்த கேத்தரின் என்ன ஆனாள்? என்பதை எமோஷனலாக சொல்லியிருப்பதே ‘ஃபியூரி’.
கலிபோர்னியாவின் சான் ஜோஸ் நகரில் நடந்த ப்ரூக் ஹார்ட் கொலைச் சம்பவத்தை அடிப்படையாகக் கொண்டு நார்மன் கிராஸ்னா “மாப் ரூல்” என்ற கதையை எழுதி இருந்தார். அதைத் தழுவி, பார்ட்லெட் கார்மேக் என்பவருடன் இணைந்து திரைக்கதை எழுதி, ஜெர்மனின் புகழ் பெற்ற இயக்குநரான ஃபிரிட்ஸ் லாங், தனது ஹாலிவுட் பயணத்தை தொடங்கினார்.
இன்று நாம் பார்க்கும் பல ‘சைக்காலஜிக்கல் த்ரில்லர்’ மற்றும் ‘டார்க் க்ரைம்’ படங்களுக்கான இலக்கணத்தை வகுத்துத் தந்தவர் ஃபிரிட்ஸ் லாங். அழகியலை விரும்பும் ஹாலிவுட் பட உலகில் உளவியலை வெளிப் படுத்தும் ஜெர்மன் ‘எக்ஸ்பிரஷனிச’த்தை இணைத்து தனித்துவமான படமாக உருவாக்கினார். ஸ்பென்சர் ட்ரேசியின் நடிப்பு இப்படத்தின் முதுகெலும்பு.
‘பராசக்தி’ சிவாஜி கணேசனின் சாயலில் அப்பாவி காதலனாகத் தோன்றும் அவர், மொத்த கும்பலும் தம்மை கொல்லத் துடிப்பது கண்டு வெறுப்புற்று, இறுகிப் போன மனநிலையில் இரண்டு விதமான பரிமாணங்களை நடிப்பில் வெளிப்படுத்தியிருக்கிறார்.
வசனம் இல்லாமலே, சிறைக் கம்பிகளுக்குப் பின்னால் அவர் காட்டும் பயம், கோபம் பார்வையாளர்களை உலுக்கக்கூடியது. எளிமையான ஒப்பனையுடன், குறும்புத்தனமாகக் காதலனுடன் பேசுவதிலும், காதலன் இறந்துபோன செய்தி கேள்விப்பட்டு புத்தி பேதலித்து திரிவதுமாக சில்வியா சிட்னி, கேத்தரின் என்ற கேரக்டராகவே வாழ்ந்திருக்கிறார்.
ஷெரீப்பாக வரும் எட்வர்ட் எல்லிஸ் முதலில் கம்பீரமாக விசாரித்தாலும் கூட்டம் கூடியதும் தன் கையாலாகத்தனத்தை வெளிப்படுத்தி இருக்கிறார். 10 அகாடமி விருதுகளுக்குப் பரிந்துரைக்கப்பட்டு 4 விருதுகளை வென்ற ஒளிப்பதிவாளர் ஜோசப் ரட்டன்பெர்க், படத்தின் இருண்ட மனநிலையை ஒளி மற்றும் நிழல்களின் மூலம் பிரதிபலிக்கிறார்.
சிறைச்சாலை எரிக்கப்படும் காட்சியில், தீயின் உக்கிரத்தைக் காட்டுவதை விட, அதை ரசித்து வேடிக்கை பார்க்கும் மக்களின் முகபாவனைகளில் இருக்கும் குரூரத்தைக் காட்டிய விதம் அதிர வைக்கிறது. வதந்திகள் எப்படி மின்னல் வேகத்தில் பரவுகின்றன என்பதை விளக்க, கோழிக்குஞ்சுகள் மற்றும் பெண்கள் பேசிக்கொள்ளும் காட்சிகளை இணைத்து அமைத்த ‘மாண்டேஜ்’ உத்தி இன்றும் ஒரு பாடம்.
வில்சன் மனக் குழப்பத்தில் இருக்கும்போது அந்த 22 பேர்களின் முகங்களும் அவரைச் சுற்றி இருப்பதைக் காட்டுவது மற்றும் அரசு வழக்கறிஞர் எப்படி வாதாடப் போகிறோம் என்று பேசும்போதே பார்வையாளர் ரியாக் ஷனுடன் நீதிமன்ற அறைக்கு அந்த காட்சியை அழைத்துச் சென்ற விதம் என ஃபிராங்க் சல்லிவனின் எடிட்டிங் படத்துக்குப் புது ஸ்டைலை கொடுத்தது.
நேர்த்தியான பின்னணி இசையின் மூலம் படம் முழுவதும் ஒருவித பதற்றத்தை தக்கவைத்ததில் இசையமைப்பாளர் ஃபிரான்ஸ் வாக்ஸ்மேனின் மேதமை தெரிகிறது. விசாரணை நடக்கும்போது நீதிபதியே சாட்சிக் கூண்டில் ஏற்றப்பட்டு விசாரிக்கப்படுவதும், நீதிமன்றத்தையே தியேட்டராக்கி நியூஸ் ரீல் முக்கிய சாட்சியாக திரையிடப்படுவதும் ரசிக்க வைத்த புதிய மற்றும் நுட்பமான காட்சிகள்.
கும்பலாக சேரும்போது மக்கள் சிந்திக்காமல் எப்படி மூர்க்கத்தனமாக மாறுகிறார்கள் என்பதை இப்படம் மிகத் துல்லியமாகப் பதிவு செய்துள்ளது. இது வெறும் குற்றப்படம் அல்ல. சமூக மனசாட்சியை உலுக்கும் சினிமா ஆவணம்.
இந்தப் படத்தை ‘ரீமாஸ்டரிங்’ செய்து இப்போது வெளியிட்டாலும் புதுப் படம் என்றே நினைக்குமளவுக்கு காட்சி உத்தியிலும், ஒளிப்பதிவிலும் தொழில்நுட்ப நேர்த்தி இருக்கிறது. ஒரு மதிய வேளையை தாராளமாக இப்படத்துக்கு அர்ப்பணிக்கலாம்.
(செவ்வாய்தோறும் படம் பார்ப்போம்)
