“ஒருவன் குற்றவாளியா, நிரபராதியா என்பதை வழக்கறிஞர்களின் வாதங்களும், நிரூபிக்கப்படும் ஆதாரங்களுமே தீர்மானிக்கின்றன என்ற உண்மையை கூறு போட்டு ஆராயும் சட்ட நுணுக்கப் படம், 1959-ல் வெளியான ‘அனாடமி ஆஃப் எ மர்டர்’ வழக்கு ஒன்றில் தோல்வி அடைந்ததால் அவமானப் படுத்தப்பட்ட பால் பீக்லர் என்ற வழக்கறிஞருக்கு, பார்னெல் மெக்கார்த்தி என்ற குடிகார நண்பரே ஆறுதல்.
செகரட்டரி ‘மைடா’வுக்கு பலமாத சம்பள பாக்கி என்றாலும் வேலையில் குறை வைப்பதில்லை. அவள் எழுதி வைத்த குறிப்பிலுள்ள நம்பருக்கு பீக்லர் போன் செய்கிறார். லாரா மானியன் என்ற பெண்மணி, கொலை செய்துவிட்டு சிறையில் இருக்கும் தன் கணவருக்கு உதவ முடியுமா? என்று கேட்கிறாள்.
அடிக்கடி மீன்பிடிக்க செல்வதால் கொலை விவரம் தெரியாத பால் பீக்லரிடம் அந்த கேஸை எடுக்கச் சொல்கிறார் மெக்கார்த்தி. லாராவின் கணவர் லெப்டினென்ட் ஃப்ரெட்ரிக் மானியன், லாராவை பாலியல் வன்கொடுமை செய்த பார் உரிமையாளர் பார்னி குவில் என்பவனை கொன்றுவிட்டு சிறையில் இருக்கிறார்.
அடுத்தநாள் லெப்டினென்டை சந்தித்து சில கேள்விகளைக் கேட்கிறார், பீக்லர். பின்னர் லாராவிடம் பேசுகிறார். வழக்கு விசாரணைக்கு எடுத்துக் கொள்ளப்படுகிறது. சாட்சிகள் விசாரிக்கப்படுகிறார்கள். பார்னியின் சொத்துக்களை நிர்வகிக்கும் மேரி பிலான்ட் என்பவளும் ‘பார்னி எந்தப் பெண்ணிடமும் தவறாக நடக்க மாட்டார்’ என்று சாட்சி சொல்கிறாள்.
எதிர்தரப்பு வழக்கறிஞர்கள் லாராவை கேள்விகளால் கிழித்தெடுக்கிறார்கள். வன்கொடுமையின் முக்கிய ஆதாரமான உள்ளாடை சம்பவ இடத்தில் தேடிப் பார்த்தும் கிடைக்கவில்லை என்று போலீஸ்காரர்கள் சொல்கிறார்கள். லாரா உண்மையில் பாலியல் வன்கொடுமை செய்யப்பட்டாளா? காணாமல் போன அந்த உள்ளாடை, எப்படி கிடைத்தது? துப்பாக்கியால் சுட்டுக் கொலை செய்த லெப்டினென்ட் எப்படி விடுதலை ஆகிறார்? என்பதை ஆற அமர, கூறு போட்டு விளக்குவதே ‘அனாடமி ஆஃப் எ மர்டர்’.
இது கதையல்ல. உண்மை சம்பவம்! 1952 -ம் ஆண்டு நடந்த கொலை வழக்கில் வழக்கறிஞராக ஆஜரான ஜான் டி.வோல்கர், அதன்பிறகு மிச்சிகன் மாநில நீதிபதியாக பணிபுரிந்தார். அப்போது ‘ராபர்ட் ட்ரேவர்’ என்ற புனைப் பெயரில் அந்த கொலை வழக்கை ஒருநாவலாக எழுதி வெளியிட்டார். நாவலை அடிப்படையாக வைத்து வெண்டல் மேய்ஸ் சுவாரஸ்யமான திரைக்கதை எழுத, இப்படத்தை தயாரித்து இயக்கியவர் ஒட்டோ பிரெமிங்கர்.
பால் பீக்லராக நடித்த ஜேம்ஸ் ஸ்டீவர்ட், சாட்சிகளிடம் கிண்டலும் கேலியும் கலந்து கேள்வி கேட்பதிலும், எதிர்தரப்பு வழக்கறிஞர்களிடம் தனது சாட்சிகள் மாட்டும்போது உச்சஸ்தாயியில் அப்ஜெக் ஷன் தெரிவிப்பதிலும், தனது ‘கேரியர் பெஸ்ட்’ நடிப்பை வழங்கியிருக்கிறார். பீஸ்கூட வாங்காமல் ஏமாறும் வழக்கறிஞருக்கு லைஃப் டைம் செட்டில்மென்ட் வழங்கலாம்.
அவருக்கு ஆலோசகராக, குடிகார பெரியவராக ஆர்தர் ஓ கானலும், ஊதியம் வாங்கும்வரை வேலையை விட்டுப் போக மாட்டேன் என்று உறுதியாக இருக்கும் உயரமான, அழகான செகரட்டரியாக ஈவ் ஆர்டனும் நல்ல பங்களிப்பு. முக்கிய குற்றவாளி ஃப்ரெட்ரிக் மான்யனாக நடித்திருக்கிறார், பென் கஸ்ஸாரா.
முகத்தில் பதற்றம், இறுக்கமான உடல். மனைவியைக் பாலியல் வன்கொடுமை செய்தவனைச் சுட்டுக் கொன்றுவிட்டு ஞாபகமே இல்லை என்கிறார். கதையின் திருப்புமுனை சொல்லான ‘இர்ரெசிஸ்டிபிள் இம்பல்ஸ்’ அவர் நடிப்பிலும் இருக்கிறது. நடிகை ‘லீ ரெமிக்’ பாதிக்கப்பட்ட லாரா மானியனாக, கேஸுவலாக கூலிங் கிளாஸ், டைட் ஜீன்ஸ், பாவாடை சகிதம் வலம் வருகிறார்.
பார்ட்டி, சரக்கு என்று அலையும் அவளை ஒரு கட்டத்தில் பீக்லரே “உன் கணவன் ரிலீஸ் ஆகும்வரை அடக்க ஒடுக்கமா இரு” என்று அட்வைஸ் பண்ண வேண்டியதாகிறது. ரொமான்ஸ் வழியும் பார்வையுடன் ‘நல்லவரா, கெட்டவரா?’ என்று யூகிக்க முடியாத வகையில் நடித்திருக்கிறார். எதிர்தரப்பு வழக்கறிஞர்களாக வரும் ப்ரூக்ஸ் வெஸ்ட் மற்றும் ஜார்ஜ் சி ஸ்காட்டின் குதர்க்கமான கேள்விகளால் சாட்சிகளுக்கு வருகிறதோ இல்லையோ? நமக்கு வருகிறது கோபம்! வில்லத்தனமான நடிப்பு.
நீதிபதி எழுதிய கதை என்பதால், நீதிமன்றத்தில் நடக்கும் சிறிய யுக்திகள், நீதிமன்ற நடைமுறைகள் அனைத்தும் யதார்த்தமாகவும், நுணுக்கமாகவும் காட்டப்பட்டுள்ளன. தொழில்முறை நடிகர் அல்லாத உண்மையான வழக்கறிஞரான ஜோசப் வெல்ச் என்பவரை நீதிபதியாக்கி இருக்கிறார்கள். காமெடி கலந்து பேசுவதோடு நேர்மைக்கு நெருக்கமானவராக நடித்திருக்கிறார்.
அவரது உடல்மொழி வெகு இயல்பாக இருக்கிறது. கொல்லப்பட்ட பாலியல் குற்றவாளியான பார்னி குவில்-லாக முர்ரே ஹாமில்டன் புகைப்படத்தில் மட்டுமே நடித்திருக்கிறார். மொத்தக் கதையும் இவரைச் சுற்றித்தான்! கேத்ரின் கிரான்ட், மேரி பிலான்ட் ஆக வருகிறார். அமைதியான அதே நேரம் அழுத்தமான நடிப்பு. கிளைமாக்ஸில் ஸ்காட் கேட்கும் முறை தவறிய கேள்விக்கு ‘பார்னி குவில் என் அப்பா’ என்று கத்தும்போது மொத்த நீதிமன்றத்தையும் அமைதிப்படுத்தி விடுகிறார்.
காணாமல் போன உள்ளாடையை சலவை அறையில் அப்பா போட்டிருந்ததை அவள் கொண்டு வந்து கொடுத்ததாலேயே வன்கொடுமை நிரூபிக்கப்படுகிறது. ஒளிப்பதிவாளர் சாம் லெவிட், நீதிமன்றத்தின் அசலான முகம் மற்றும் நடிகர்களின் உணர்ச்சிகளைத் துல்லியமாகக் காட்டிய விதத்தில் டைரக்டரின் கண்களாகச் செயல்பட்டிருக்கிறார்.
உறுத்தாத ஒளிப்பதிவுக்குத் துறுத்தாத எடிட்டிங். லூயிஸ் ஆர் லொஃப்லர் 100 படங்களுக்குமேல் பணிபுரிந்த கோல்டன் ஏஜ் எடிட்டர். படத்தின் நீளமான நீதிமன்ற காட்சிகளுக்கு கத்தரி போடாமல் நம்மையும் அங்குள்ள ஜூரிக்கள்போல் அமர வைத்துவிடுகிறார். ட்யூக் எலிங்டன், இசையால் அவ்வப்போது அதிர வைக்கிறார். அதற்குமுன் படங்களில் வந்த நீதிமன்ற காட்சிகளுக்கு பயங்கர ஆர்கெஸ்ட்ரா மற்றும் கிளாசிக்கல் நோட்களுடன் இசை இருக்க, இப்படத்தின் ஜாஸ் இசை புதுமையாக இருப்பதால் ரசிக்கப்பட்டது.
‘தற்காலிக பைத்தியம்’ என்ற வாதத்தால் ஒட்டுமொத்த ஜூரிக்களும், குற்றவாளிக்கு விடுதலை வழங்குவதும் நீதிமன்றத்தில் பாலியல் சொற்களை பயன்படுத்திய விதமும் சர்ச்சையானது. கதையில் எந்த கேரக்டரையும் நல்லவர், கெட்டவர் என்று விவரித்துக் காட்டவில்லை.
குற்றத்தைக் காட்டாமல், குற்றம் நடந்த மனநிலையை காட்டி நீதிமன்ற அறையை, மனநல ஆய்வுக்கூடமாகவே மாற்றிவிட்டார் இயக்குநர் ஒட்டோ பிரெமிங்கர். நவீன ‘கோர்ட் ட்ராமா’ படங்களின் முன்னோடியான சற்றே பெரிய இப்படத்தை திரைக்கதை கட்டமைப்புக்காகவும் வசனங்களின் சுவாரஸ்யத்துக்காகவும் அனுபவித்து ரசிக்கலாம்.
(செவ்வாய்தோறும் படம் பார்ப்போம்)
- ramkumaraundipatty@gmail.com